"3M" şirkəti zəhərli kimyəvi maddələrlə bağlı iddialara görə 7,35 milyard dollar ödəyəcək

ABŞ-ın sənaye və texnologiya şirkəti "3M" insan sağlamlığına zərər vurduğu iddia edilən PFAS kimyəvi maddələri ilə bağlı məhkəmə iddialarını həll etmək üçün 7,35 milyard dollar ödəməyə razılaşıb. Razılaşma təxminən 115-120 min iddiaçını əhatə edə bilər.

Sonxeber.az Reuters-ə istinadən xəbər verir ki, şirkət ödənişləri doqquz il ərzində həyata keçirəcək. Razılaşma hazırda mövcud olan şəxsi sağlamlığa zərər iddialarının təxminən 99 faizini əhatə edir.

Mübahisənin mərkəzində PFAS adlanan və ətraf mühitdə çox uzun müddət parçalanmadan qala bilən kimyəvi maddələr dayanır. Bu maddələr istiliyə, yağa, suya və ləkələrə davamlılıq xüsusiyyətlərinə görə müxtəlif sənaye məhsullarında istifadə olunub.

Məhkəmə iddialarının əsas hissəsi yanğınsöndürmə zamanı istifadə edilən xüsusi köpüklərlə bağlıdır. İddiaçılar həmin məhsullardakı kimyəvi maddələrin içməli su mənbələrini çirkləndirdiyini və müxtəlif sağlamlıq problemlərinə səbəb olduğunu bildirirlər. İddialarda xərçəngin bəzi növləri də qeyd olunur.

Şirkət razılaşma çərçivəsində 2026-cı ildə 50 milyon dollar ödəyəcək. 2027-ci il üçün ödəniş nəzərdə tutulmayıb. Vəsaitin əhəmiyyətli hissəsinin isə son iki ildə köçürülməsi planlaşdırılır.

"3M" rəhbərliyi razılaşmanın uzun müddətdir davam edən hüquqi qeyri-müəyyənliyi azaltmağa kömək edəcəyini bildirib. Bununla belə, şirkət ödəniş qərarının hüquqi məsuliyyətin etirafı olmadığını vurğulayıb.

Qeyd edək ki, "3M" 2025-ci ilin sonunadək bütün dünyada PFAS istehsalını dayandırdığını açıqlamışdı. Şirkət 2023-cü ildə də ABŞ-da içməli su təchizatçıları ilə bağlı iddiaların həlli üçün 10,3 milyard dollarlıq razılaşma əldə etmişdi.

Müəllif: İlkin Məmmədkərimov

Telegramda izləyin