NATO Rusiyanın dərinliklərindəki hərbi obyektlərə zərbələri istisna etmir

NATO-nun yenilənmiş müdafiə strategiyası Rusiyanın arxa cəbhəsində yerləşən hərbi bazaların, təchizat anbarlarının və sənaye obyektlərinin vurulmasını da nəzərdə tutur.
Bizimyol.info xəbər verir ki, bu barədə "The Wall Street Journal" (WSJ) qəzeti məlumat yayıb.

Nəşrin məlumatına görə, iyun ayında NATO-da uzaqmənzilli və dərinlikdə yerləşən hədəflərə zərbələr endirilməsi mövzusunda simpozium keçirilib.

Müzakirə olunan yeni konsepsiya yalnız alyans ölkələrinin sərhədlərini keçə biləcək qoşunların atəşə tutulmasını deyil, həm də Rusiya ərazisində cəbhə xəttindən uzaqda yerləşən hərbi bazalara, təchizat anbarlarına və sənaye obyektlərinə zərbələr endirilməsini nəzərdə tutur.

Rusiya hakimiyyəti ölkənin NATO dövlətlərinə hücum etmək planlarının olması ilə bağlı iddiaları dəfələrlə təkzib edib.

Rusiya Prezidenti Vladimir Putin Qərb siyasətçilərinin bu cür bəyanatlarını öz əhalisini qorxutmaq və hərbi xərclərin artırılmasına haqq qazandırmaq cəhdi adlandırıb.

Kremlin sözçüsü Dmitri Peskov isə NATO-nun həddindən artıq hərbiləşmə yolunu tutduğunu bildirib. Onun sözlərinə görə, Rusiyanın təhdid kimi təqdim edilməsi alyans üzvü olan ölkələrin müdafiə xərclərini ÜDM-in 5 faizinə çatdırmaq qərarını əsaslandırmaq üçün istifadə olunur.

Peskov həmçinin Avropada yeni təhlükəsizlik arxitekturasının formalaşdırılmasının Rusiya ilə dialoqu zəruri edəcəyini vurğulayıb.

Telegramda izləyin