Almaniya təhlükəsizlik narahatlıqlarına görə hərbi bazalarda Çin istehsalı dronları qadağan edib

Almaniya təhlükəsizlik risklərini əsas gətirərək Çin istehsalı olan kommersiya dronlarının hərbi bazalarda və təlim poliqonlarında istifadəsini qadağan edib.
Bizimyol.info xəbər verir ki, qərar dərhal qüvvəyə minib. Son illərdə hərbi bölmələr tərəfindən alınmış Çin istehsalı dronların mümkün qədər tez xidmətdən çıxarılması nəzərdə tutulur.

Qərb ölkələrinin hərbi qüvvələri Çin texnologiyalarının məxfi məlumatları Pekinə ötürə biləcəyindən getdikcə daha çox narahat olurlar.

Mətbuatın verdiyi məlumata görə, Almaniya hərbi hissələrinə 2024-cü ildən etibarən Çin şirkəti DJI də daxil olmaqla, müxtəlif istehsalçıların dronlarını almağa icazə verilmişdi. Lakin hərbi hissələrin satınalmaları ilə bağlı vahid qeydiyyat sisteminin olmaması ümumi qadağanın tətbiqinə səbəb olub.

Oxşar addımlar digər ölkələr tərəfindən də atılır. Fevral ayında Polşa Çin istehsalı avtomobillərin hərbi obyektlərə daxil olmasını qadağan edib. ABŞ hərbçiləri isə Yaponiyanın Okinava adasındakı Kadena aviabazasında Çinin BYD şirkətinə məxsus elektromobillərin istifadəsinə məhdudiyyət qoyublar.

Bundan başqa, Niderlandın təhlükəsizlik qurumları müasir avtomobillərdəki mikrofon, kamera və GPS sistemlərinin xarici dövlətlər tərəfindən məlumat toplamaq üçün istifadə oluna biləcəyi barədə xəbərdarlıq edib.

Avropa Parlamentinin bir qrup deputatı da BYD avtomobillərinin potensial təhlükəsizlik risklərinin araşdırılması və zərurət yaranarsa, şirkətin yüksək riskli təchizatçılar siyahısına daxil edilməsi ilə bağlı Avropa Komissiyasına müraciət edib.

BYD isə açıqlamasında avtomobillərdə və bulud sistemlərində saxlanılan məlumatların Çindən uzaqdan əldə edilməsinin mümkün olmadığını, müştərilərin öz məlumatlarına nəzarət etdiyini bildirib.

Telegramda izləyin