Dublində 50-yə yaxın ölkənin liderləri bir araya gəlir: Azərbaycan üçün mühüm məsələlər müzakirə olunacaq

İrlandiyanın paytaxtı Dublində Avropa Siyasi Birliyinin (ASB) sammitinə start verilib. Görüşdə Avropa ölkələri ilə yanaşı, digər tərəfdaş dövlətləri təmsil edən 50-yə yaxın ölkənin liderləri iştirak edir. Kanada da sammitə xüsusi qonaq qismində dəvət olunub.

Sonxeber.az xəbər verir ki, Dublin Konqres Mərkəzində keçirilən tədbirə Avropa İttifaqı Şurasının Prezidenti Antonio Koşta və İrlandiyanın Baş naziri Mixal Martin həmsədrlik edirlər.

"Avropa - güclü, təhlükəsiz və əlaqəli" şüarı ilə təşkil olunan sammitdə qitənin təhlükəsizlik arxitekturası, Rusiya-Ukrayna müharibəsi, enerji təminatı, iqtisadi rəqabət və nəqliyyat əlaqələrinin genişləndirilməsi əsas müzakirə mövzularıdır.

Görüşdə Avropa dövlətlərinin müdafiə potensialının artırılması, kiberhücumlar və dezinformasiya ilə mübarizə, eləcə də təhlükəsizlik sahəsində Avropa ilə ABŞ arasında məsuliyyət bölgüsü məsələlərinin də müzakirəsi nəzərdə tutulur.

İqtisadi məsələlər sırasında rəqəmsal infrastrukturun inkişafı, innovasiyaların təşviqi, enerji resurslarının etibarlı təchizatı və Avropa iqtisadiyyatının qlobal böhranlara qarşı dayanıqlığının gücləndirilməsi xüsusi yer tutur.

Sammit Azərbaycan baxımından da diqqət çəkən siyasi platformadır. Ölkəmizin Avropanın enerji təhlükəsizliyindəki rolu, Cənubi Qafqazda sülh gündəliyi və Orta Dəhlizin inkişafı müzakirə edilən istiqamətlərlə birbaşa əlaqəlidir. Xüsusilə Cənub Qaz Dəhlizi vasitəsilə Avropaya qaz ixracı Azərbaycanın enerji tərəfdaşı kimi əhəmiyyətini artırır.

Azərbaycan və Ermənistan arasında sülh prosesinin davam etdirilməsi, regionda uzunmüddətli sabitliyin təmin olunması, həmçinin Asiya ilə Avropanı birləşdirən nəqliyyat marşrutlarının genişləndirilməsi də Avropa üçün strateji əhəmiyyət daşıyan məsələlərdəndir.

Qeyd edək ki, Avropa Siyasi Birliyi 2022-ci ildə yaradılıb. Platformanın əsas məqsədi Avropa İttifaqına üzv olan və olmayan ölkələr arasında siyasi dialoqu və əməkdaşlığı gücləndirməkdir. Təşkilat ayrıca hüquqi öhdəliklər yaradan qərarlar qəbul etmir və yeni Aİ institutlarının yaradılmasını nəzərdə tutmur.

Məlumata görə, Avropa Siyasi Birliyinin növbəti sammitinin 2028-ci ilin mayında Azərbaycanda keçirilməsi planlaşdırılır. Bu isə Bakıya Avropa ölkələrinin liderlərini qəbul etmək və regional məsələlərlə bağlı beynəlxalq dialoqa ev sahibliyi etmək imkanı verəcək.

Dublindəki sammitin ardından noyabrın 13-də Avropa İttifaqına üzv 27 ölkənin liderləri ayrıca qeyri-rəsmi görüş keçirəcəklər.

Müəllif: İlkin Məmmədkərmov

Telegramda izləyin