Ərazi bütövlüyünün bərpasından sonra Konstitusiyanın əhəmiyyəti daha da artıb

"Bu gün bizim üçün əlamətdar gündür. Belə ki, 12 noyabr müstəqil Azərbaycan dövlətinin Konstitusiya Günüdür. 1995-ci ildə Azərbaycan tarixində ilk dəfə ümumxalq referendumu keçirildi və müstəqil dövlətimizin Konstitusiyası qəbul olundu".

Bu fikirləri Sonxeber.az-a açıqlamasında politoloq Samir Hümbətov bildirib.

"Konstitusiyanın mövcudluğu dövlətçiliyimizin inkişafı, möhkəmlənməsi və sağlam təməllər üzərində qurulması baxımından olduqca mühüm əhəmiyyət daşıyır. Bu günə qədər Azərbaycanda dörd dəfə - 1995, 2002, 2009 və 2016-cı illərdə referendum keçirilib. Müxtəlif dövrlərin tələblərinə uyğun olaraq Konstitusiyaya müəyyən dəyişikliklər və əlavələr edilib. Bu addımları dövlətin və dövlətçiliyin qorunması və inkişafı istiqamətində atılmış mühüm tədbirlər kimi qiymətləndirmək olar.

Ərazi bütövlüyümüzün təmin olunması, suverenliyimizin bərpası da Konstitusiyamızın hüquqi qüvvəsinin və dövlətçilik baxımından əhəmiyyətinin möhkəmlənməsinə təsir edən amillərdəndir. Düşünürəm ki, bu gün artıq tam müstəqil və suveren dövlətin Konstitusiyasına malik olduğumuzu rahatlıqla deyə bilərik. Çünki ərazilərimiz işğaldan azad olunub, ərazi bütövlüyümüz və suverenliyimiz tam şəkildə bərpa edilib.

Dövlət idarəçiliyinin əsaslarının qurulması və davam etdirilməsi üçün Konstitusiyanın, hüququn və qanunun aliliyinin təmin olunması vacibdir. Bu prinsiplər dövlət idarəçiliyinin möhkəmlənməsində mühüm rol oynayır. Gələcəkdə də zərurət yarandıqca referendumların keçirilməsi mümkündür. Çünki dövr və şərtlər dəyişdikcə dövlətin qanunvericiliyinə də müəyyən dəyişikliklər və əlavələr edilməsi normal prosesdir.

Müasir və çağdaş Azərbaycanın yeni dövrün tələblərinə uyğun hüquqi tənzimləmələrə ehtiyacı var. Düşünürəm ki, bu zərurət nəzərə alınaraq Konstitusiyanın və Azərbaycan qanunvericiliyinin müasir reallıqlara uyğunlaşdırılması istiqamətində işlərə ehtiyac yaranır. Böyük ehtimalla, qarşıdakı dövrdə bu istiqamətdə müəyyən addımların şahidi ola bilərik".

Röyalə Xəyal

Telegramda izləyin