ABŞ, Yaponiya, Avstraliya və Filippin Tayvan ətrafında birgə hərbi koordinasiya mərkəzi yaradır

ABŞ, Yaponiya, Avstraliya və Filippin Tayvan ətrafında mümkün hərbi böhran zamanı birgə fəaliyyətin əlaqələndirilməsi üçün yeni koordinasiya mərkəzi yaratmaq barədə razılığa gəliblər.

Reuters-in məlumatına görə, mərkəz dörd ölkənin hərbi planlaşdırma və məlumat mübadiləsini gücləndirməyə xidmət edəcək. Təşəbbüs Çinin Tayvan ətrafında və Qərbi Sakit okeanda hərbi fəallığını artırdığı bir vaxta təsadüf edir.

Çin Hərbi Dəniz Qüvvələrinin müxtəlif əməliyyat komandanlıqlarına məxsus gəmilərin iştirakı ilə keçirilən təlimlər Tayvan hakimiyyətində narahatlıq yaradıb.

Sonxeber.az Reuters-ə istinadən xəbər verir ki, Tayvan tərəfi bu fəaliyyətləri adanın mümkün blokadasına hazırlıq kimi qiymətləndirir.

Pekin isə təlimlərin müdafiə xarakterli olduğunu və heç bir ölkəyə qarşı yönəlmədiyini bildirir.

Reuters qeyd edir ki, Tayvan ətrafında mümkün blokada qlobal ticarətə və xüsusilə yarımkeçirici istehsalı ilə bağlı təchizat zəncirlərinə ciddi zərbə vura bilər.

Müəllif: İlkin Məmmədkərimov

Telegramda izləyin