"Əyləncə mərkəzləri, restoranlar - hamısı bağlanmalıdır" - AÇIQLAMA

Son günlər uşaqlar arasında xəstəlik artıb. Əvvəl böyüklər yoluxurdusa, artıq uşaqlar da yoluxur. Məktəb və universitetlərdə vəziyyət heç yaxşı deyil. Müvəqqəti olsa belə, distant təhsilə keçmək gözlənilirmi?

Məsələ ilə bağlı Sonxeber.az saytına təhsil eksperti Kamran Əsədov açıqlama verib.

O bildirib ki, hazırkı vəziyyətdə təhsil müəssisələrinin distant təhsilə keçməsi effektiv deyil. Əvəzində isə bütün fəaliyyət sahələrini dayandırıb, yalnız təhsil ocaqlarını açıq saxlasaq, daha yaxşı olar.

"İlk növbədə onu qeyd edim ki, hazırda orta ümumtəhsil müəssisələrində şagird, müəllim və tələbələr arasında ciddi şəkildə yoluxma halları müşahidə edilir. Hesab edirəm ki, əlbəttə, bu, təhlükəli tendensiyanın başlanğıcını da göstərmiş ola bilər.

Düzdür, biz əvvəlki illərin xəstəliklərinin statistikasına baxanda görürük ki, mövsümi olaraq həmin vaxtda da təhlükəli vəziyyət olub. Amma indi vəziyyət bir az fərqlidir. Çünki artıq dünyanın bir sıra ölkələrində koronavirusun yeni növləri ortaya çıxır.

Eyni zamanda, valideynlər bu mövcud vəziyyətdən çox narahatdırlar. Hesab edirəm ki, biz şagirdlər arasında normal qripin yayıldığını, hətta bunun kəskin formasını da görürük.

Əlbəttə, şagirdlərin sağlamlığı hər şeydən önəmlidir, amma ikinci bir məsələ tədris təşkili ilə bağlıdır ki, məsafədən tədrisi təşkil etməkdə çətinlik çəkirik. Distant təhsil o qədər də keyfiyyətli deyil. Məhz bu amilə görə biz distant təhsilə keçməməliyik.

Yeganə çıxış yolu odur ki, hansı məktəblərdə yoluxma müşahidə ediləcəksə, ancaq onlar bu sistemə keçsinlər. Çünki biz problemi təkcə təhsil müəssisələrinin üzərinə ata bilmərik. Digər fəaliyyət sahələrində də biz bunu müşahidə edirik.

Əyləncə mərkəzləri, restoranlar - hamısı bağlanmalıdır. İndiyə kimi bütün hər yer açıq idi, təhsil müəssisələri bağlı olurdu, İndi əksinə etmək lazımdır. Hər yeri bağlayaq, bir tək məktəblər açıq qalsın. O zaman görək vəziyyət necədir?"

ZAİRA AKİFQIZI

Telegramda izləyin