Hansı vətəndaşlara yalnız bir doza vaksin vurulmalıdır?

Azərbaycanda koronavirusa yoluxan şəxs rəsmi qeydiyyata düşərək immunitet sertikatı alandan 6 ay keçdikdən sonra bir doza vaksin vurdurmaqla peyvənd sertifikatını müddətsiz uzada bilər. Həmin sertifikatla da ölkə daxilində pasport tələb olunan məkanlara rahatlıqla daxil olmaq mümkündür.

Medicina.az xəbər verir ki, bunu Report-a açıqlamasında Tibbi Ərazi Bölmələrini İdarəetmə Birliyinin (TƏBİB) İnfeksion xəstəliklər üzrə işçi qrupunun həkim-infeksionisti Nəzrin Mustafayeva deyib.
Onun sözlərinə görə, bəzən həmin şəxslərin vaksin sertifikatı deyil, müddətsiz immunitet sertifikatı olur:

"Bir çox hallarda vətəndaş xaricə getmək istəyəndə ondan iki doza peyvənd sertifikatı tələb olunur. Onun da iki doza peyvənd sertifikatı olmadığına görə (sadəcə buster, yəni qüvvətləndirici doza vurularaq immun sertifikatının müddəti uzadılıb) xaricə gedə bilmir. Çünki ölkə xaricinə çıxış zamanı tələb olunan qaydalara görə həmin şəxslərin mütləq qaydada iki dozalı vaksin sertifikatı olmalıdır. Yəni, xaricə getməyi planlaşdırmayan vətəndaşlarımız immun sertifikatının bitməsindən sonra 1 doza peyvənd vurdurmaqla kifayətlənə bilərlər".

Həkim-infeksionist onu da xatırladıb ki, hazırda ilkin vaksinasiyanın 6-cı ayında buster və ya revaksinasiya (vətəndaş 28 gün intervalla 2 doza vaksin vurdurubsa və 6-cı ayda yenidən 28 gün intervalla 2 doza vaksin olunursa, bu revaksinasiya adlanır) mümkündür:

"COVİD-19 xəstəliyinə qarşı 2 doza vaksin vurdurduqdan 6 ay sonra orqanizmin bu virusa qarşı müqaviməti azalır. Orqanizmin koronavirus infeksiyasına qarşı müqavimətini yenidən artırmaq üçün buster dozanın (3-cü doza) vurulması tövsiyə olunur. Buster dozadan sonra 4-cü doza vətəndaşın sağlamlıq vəziyyəti nəzərə alınaraq həkim məsləhətinə əsasən vurula bilər".

Qeyd edək ki, avqust ayından etibarən ölkədə buster dozanın vurulmasına başlanılıb. COVID-19 xəstəliyinə yoluxmuş və immunitet sertifikatı əldə etmiş şəxs 6-cı aydan başlayaraq, yəni sertifikatın qüvvədə olma tarixi bitdikdən sonra 56 gün müddətində qüvvətləndirici doza vurdura bilər. Buster dozanı vurdurmaqla vətəndaş immunitet sertifikatının müddətini müddətsiz olaraq uzadır. Yoluxmadan 5 ay sonra vaksinasiya üçün randevu.its.gov.az saytı üzərindən onlayn növbə götürülə bilər. Əgər "buster" dozanı vurdurmaq üçün tələb olunan vaxt yəni ki, 56 gün ötürülərsə, o zaman peyvənd sertifikatı əldə etmək üçün hər iki doza vaksin vurulmalıdır. Belə ki, vətəndaş 1-ci dozadan 28 gün sonra 2-ci doza peyvənd vurduraraq immunitet sertifikatını peyvənd sertifikatı ilə əvəz edə bilər.

Telegramda izləyin