Restoranlarda menyu niyə xarici dildədir? - Deputatdan SƏRT TƏNQİD - FOTO

Ulu öndər Heydər Əliyevin də dediyi kimi, Azərbaycan xalqının dili onun milli varlığını müəyyən edən başlıca amillərdəndir. Lakin hər kəs buna əməl etmir. Baxmayaraq ki, bura Azərbaycandır və öz ana dilimiz var, bir çox restoranlar, istirahət mərkəzləri nədənsə menyunu rus və ya ingilis dilində yazır. Nəzərə alsaq ki, ora gedən müştərilərin əksəriyyəti xarici dilləri bilmirlər, məsələ bəzi insanların haqlı narazılığına səbəb olur.

Məsələ ilə bağlı Sonxeber.az-a deputat Vüqar İskəndərov açıqlama verib.

O da problemlə bağlı narazılığının olduğunu bildirib:

"Azərbaycan Respublikasının dövlət dili Azərbaycan dilidir və bununla bağlı qanun tənzimlənir. Bütün ölkə də, rəsmi və ictimai iaşə müəsissələrində, reklamlarda əsas yazı doğma Azərbaycan dilimizdə olmalıdır.

Amma çox təssüf ki, bizdə, əsas da Bakı şəhərində, böyük ictimai iaşə obyektlərində, bəzi otellərdə hələ də menyudakı yazılar ingilis ya da rus dilindədir. Azərbaycan dilində olsa da, çox vaxt ikinci, üçüncü və ya lap aşağıda olur. Onların loqolarında da ilk öncə digər əcnəbi dillərin yazıldığının şahidi oluruq.

Əvvəla, bu, qanun pozuntusudur. Məsələnin mənəvi tərəfləri də var. Dünyanın heç bir yerində digər dillərin birinci yazılması mümkün deyil. Əslində, bu, sovet dövründən qalan ənənədir. Çox təəssüf ki, hələ də onun daşıyıcıları var.

Azərbaycanda yetərincə rus məktəbləri var. Sözsüz, bunlar olmalıdır. İnsanlar nə qədər çox dil bilsələr, intellektual tərəfimizə, inkişafımıza o qədər də çox töhfə vermiş olarlar. Amma unutmayaq ki, milli dəyər olaraq, ən əsas öz dilimizdir. Bu, bizim milli dəyərimiz, özümüzü tanımağımız, kimliyimizdir, azərbaycançılıq məfkurəsidir. Bildiyimiz kimi, bununla bağlı Ümummilli liderimizin də nəsihəti var.

O, Azərbaycan məfkurəsini xalqımıza hər zaman təbliğ edərək, öz dilimizə hörmətlə yanaşmalı olduğumuzu deyirdi. Məhz Ümummilli liderimizin hakimiyyəti dövründə kiril əlifbasından latın əlifbasına keçdik. MDB ölkələri arasında Azərbaycan ilk keçid edən ölkələrdən oldu.

Bu, dövlət tərəfindən dilimizə verilən dəyərdir. İctimai iaşə obyektlərində isə qanun pozuntularına yol verilir. Biz bunun üzərinə getməliyik, ictimai qınaq olmalıdır, bu barədə danışıb məsələni gündəmə gətirməliyik. Elə restoranlara rast gəldikdə, mütləq iradımızı bildirməliyik. Burada qanunlarla yanaşı, ictimai qınaq da öz rolunu oynamalıdır".

"Chayki"
"Gazellicafe"
"Hardrock"
"Marivanna Baku"
"Papajan by Mamajan"
ZAİRA AKİFQIZI

Telegramda izləyin