Onlar sevgili olublar? - Məktəbdə 4 uşaq anasını öldürən qazidən XƏBƏR VAR

Xəbər verdiyimiz kimi, fevralın 11-də İsmayıllı rayonu Basqal qəsəbə tam orta məktəbin həyətində 1982-ci il təvəllüdlü Gülarə Qəhrəmanovanın öldürülməsi faktı ilə bağlı rayon prokurorluğuna məlumatın daxil olub.

İsmayıllı Rayon Prokurorluğunda aparılan araşdırmalarla zərərçəkmişin iş yoldaşı 1997-ci il təvəllüdlü Bəxtiyar Əhmədlinin şəxsi münasibətlər zəminində aralarında yaranmış münaqişə zamanı Gülarə Qəhrəmanovaya bıçaqla çoxsaylı xəsarətlər yetirməklə onu qəsdən öldürməsinə dair əsaslı şübhələr müəyyən edilib. Bununla bağlı sosial şəbəkələrdə müxtəlif şayiələr yayılıb.

Məlumata görə, B.Əhmədlinin iş yoldaşı olan xadimə, 40 yaşlı Gülarə Qəhrəmanova ilə münasibətləri olub. Buna görə Gülarənin ailə üzvləri Bəxtiyarla danışaraq ona bu münasibətlərdən məlumatlı olduqlarını deyiblər. Onlar Bəxtiyara kənddə artıq söz-söhbətin yayıldığının və bunu aradan qaldırmaq üçün onun kənddən çıxmalı olduğunu deyiblər. Buna əsəbiləşən Bəxtiyar məktəbdə Gülarə ilə mübahisə edib və onu qətlə yetirib. 4 uşaq anası olan Gülarə aldığı xəsarətlər nəticəsində qan itirib və hadisə yerində ölüb. B.Əhmədli qətli törətdikdən sonra oradan qaçsa da, sonradan saxlanılıb.

Bildirilir ki, Bəxtiyar Əhmədli Vətən Müharibəsi iştirakçısı olub. O, müharibədə iştirakına görə 4 medalla mükafatlandırılıb. Onlardan ikisi Füzulinin və Şuşanın azad olunmasına görə verilib.

Məsələ ilə bağlı mərhumun qohumu Sonxeber.az-a açıqlama verib.

O bildirib ki, sosial şəbəkələrdə yazılanlar dezinformasiyadır, onlar sevgili olmayıblar:

"Mərhum qohumumuzdur. Demək olar ki, dayım qızıdır. Qazi isə kəndlimizdir, hər kəs bir-birini tanıyır. Bildiklərimi, əldə etdiyim məlumatları sizinlə bölüşüm. Deməli, bu oğlan Vətən müharibəsi iştirakçısıdır, 4 medalla təltif olunub. Şuşaya qədər gedən adamdır. Ailəsi də, nəsli də, özü də abırlı-həyalı, ibadət edən insanlardır.

Bu qazi kontuziyalıdır. Onun psixoloji problemləri var. Bizim yanımızda nəsə partlayanda qorxuruq. Amma bu adam müharibə iştirakcısıdır.
Onu işlə təmin edən zaman psixoloji durumunu nəzərə alıb, müalicə etmək lazım idi.

Keçim mətləbə. Bəxtiyar məktəbdə mühafizəçi işləyirdi, Gülarə isə xadimə idi. İş yeri elə evlərinin yaxınlığında idi. Qazi müharibədən əvvəl də, sonra da mərhumun evində usta kimi işləyib. Onlar ana-bala kimi olublar. Xanımın uşaqları da böyükdürlər.

Bəxtiyar kiməsə SMS göndərəndə səhvən Gülarəyə yollayıb. Daha sonra gəlib, səhv olduğunu deyərək mərhumun ailəsindən, özündən üzr istəyib. Digər şəxslə yazışmalarını göstərərək, başqasına göndərmək istədiyini sübut edib.

Orada Gülarənin 16 yaşlı oğlu Bəxtiyarı vurub. Onu da anlamaq olar: gəncdir, pis təsir edib. Adamın başının üstündə Allah var. O, yenə də üzrxahlıq edib və gedib.

Səhəri gün bu hadisə baş verdikdən sonra, hər kəs şoka düşüb. Çünki 1 gün əvvəl məsələni danışıb həll etmişdilər.

Kameraya baxdıqda da görünür ki, onlar məktəbdə mübahisə edirlər, əl-qol hərəkəti görünür. Qazi isə başlayır məktəbin şüşələrini qırmağa. Loru dildə desək, onun orada "beyni çönür".

Qadın qorxur və çəkilir bir kənara. Bütün şüşələri qırdıqdan sonra dam qadını bıçaqlayır. Saytlarda 42 zərbə yazılıb. Amma 20, bəlkə də çox olduğu hələ dəqiq bilinmir. Məsələ araşdırılır. Bəxtiyar dindirildikdən sonra məlumat veriləcək.

Qeyd edim ki, mərhumun nəvəsi də var idi. Özü kənd qadını, zəhmətkeş xanım idi. Yaşından da böyük görünürdü. Hər iki tərəfə müəmmalıdır ki, niyə belə olub?!

Qazini hamı mədəni oğlan kimi tanıyır. O, hər hansı bir xanımı görəndə utandığından yerə baxan adamdır.

Biz çox gözəl millətik. Pis cəhətimiz odur ki, bir şeyin dəqiqliyini bilmədən, "yıxıb sürüyürük". Ayıbdır, vallah! Kəndimizdən çıxan bir çox qəhrəmanlarımız var. İstəmərəm belə igidləri olan kənddə xoşagəlməz şayiələr yayılsın. Olmayan şeyləri yazmasınlar! Pis bir şey olsa idi, bəlkə də, fikir bildirməzdik. Amma Gülarə haqq dünyasındadır. Bilmədən kiməsə ləkə yaxmaq olmaz!

Saytlara da kimin yalan məlumat ötürdüyünü bilmirik. Bilsəydik, həmin adama elə özümüz deyərdik: "Yanında olmusan?! Bildiyin varsa, de, biz də bilək!"

Hazırda araşdırma gedir və belə bir şey varsa, elə prokurorluq özü məlumat yayar".

ZAİRA AKİFQIZI

Telegramda izləyin