Hazırkı Azərbaycan filmlərinin nöqsanları nə ilə bağlıdır? - Aktyor, yoxsa büdcə?

Hazırki Azərbaycan filmləri ilə köhnə filmlərimiz arasında böyük fərqlər var. Müqayisə etsək, indiki filmlərdə çox süniliklərə və bir sıra digər problemlərə rast gəlinir. Bəs görəsən, buna səbəb nədir? Azərbaycan filmlərində hazırda hansı nöqsanlar var?

Mövzuyla bağlı Sonxeber.az-a Türkiyənin "Savaşçı" filmində rol alan kinorejissor, ssenarist, aktyor Natiq Axund münasibət bildirib.

Onun sözlərinə görə, film çəkmək böyük vəsait tələb edir və əgər vəsait çox olarsa, iş də uğurlu alınar:

"Öncə bunu qeyd edim ki, istedadlı insanlarımız çoxdur. Adətən deyirlər ki, o vaxt istedadlı insanlar çox idi, amma indi yoxdur. Bununla heç vaxt razılaşmamışam. Hazırda da istər aktyor, istər rejissor kimi bacarıqlı insanlar var. Sadəcə şərait o şərait deyil. Hər şey maddiyyatın üzərində dayanır. Çünki film çəkmək böyük vəsait tələb edir. Əgər vəsait çox olarsa, iş də uğurlu alınar. Mənim arzum odur ki, hər kəs istədiyi büdcəni əldə edə bilsin və istədiyi filmi ərsəyə gətirsin. Təbii ki, söhbət peşəkarlıqdan gedir. İstərdim ki, peşəkar insanlara qapılar açılsın, gözəl işlər ortaya çıxsın.

Bu gün qonşu ölkə Türkiyədə bu, artıq böyük bir biznes təşkil edir. Orada dövlət tərəfindən müəyyən dəstəklərin göstərilməsinə baxmayaraq, şirkətlər də filmə, kinoya sponsor olur. Beləliklə, həmin şirkətlər dövlətə vergidən azad olurlar. Yəni vergi vermək əvəzinə, filmə dəstək olurlar, digər tərəfdən də, bununla sponsor kimi özlərini reklam edirlər. Bu şərait isə ölkə tərəfindən yaradılıb.

Bundan başqa, film gözəl alındıqda onun yetərincə müştərisi olur, ölkədən kənara satılır. Elə seriallar var ki, sezonu bitməmiş artıq başqa bir ölkədə paralel yayımlanır. Bundan başqa, onlarda sonra sponsor, baş sponsorlar olur. Yəni onlarla bizim filmlər arasında bu qədər fərq var. Ona görə onların problemi qalmır. 90 nəfərlik bir qrupda hər kəs öz işini bilir, bir rejissorun 4-5 köməkçisi olur. Söhbət hələ ikinci rejissordan gedir.

Ümumiyyətlə, mən "Savaşçı" filmində çəkilərkən setdə müşahidə etdim: əsas rejissorun heç bir əziyyəti yoxdur, çəkiliş məkanında oturub dincəlir. Ümid edirəm ki, nə vaxtsa bizdə də belə olacaq. Biznes tərəfi inkişaf edərsə, yaxşı büdcə olduqdan sonra uğurlu, yüksək işlər ortaya çıxacaq".

Aysel SƏFƏRZADƏ

Telegramda izləyin