Allergiya, yoxsa qrip? - Əgər öskürək qurudursa... - XƏBƏRDARLIQ

Allergiya immunitet sisteminin ətraf mühitdə olan, ən çox yayılmış maddələrə - qida, tük, toz və kimyəvi təmizlik vasitələrinə - qarşı spesifik və çox güclü bir qoruyucu reaksiyasıdır.

Yaz fəslinin gəlməsi ilə mövsümi allergiya da baş qaldırır. Əsasən də uşaqlarda bu mövsümdə burun axma, öskürək kimi simptomların adi qrip, yoxsa allergiya olmasını müəyyənləşdirmək çətin olur. Bəzən allergiya digər reaksiyalarla səhv salınır. Davamlı burun axması, pollinozdur, yoxsa sinusit?

Pediatr Ellada Nağıyeva Sonxeber.az-a açıqlamasında bildirir ki, allergiyanın əlamətləri haqqında məlumatın olması müalicənin düzgün aparılmasına kömək edir.

"Allergiyanın mövsümi xarakteri nəyə qarşı allergiyanın olmasından asılıdır. Məsələn, hansısa insanda bitkilərin polenlərinə qarşı allergiya varsa, ağacların çiçəkləndiyi dövrdə onların allergiyası daha qabarıq formada özünü göstərəcək.

Qida allergiyası həmin qidanın qəbulu zamanı bəlli olur.

Ev tozuna qarşı allergiyanın isə hər hansı bir mövsümü olmur. Bu allergiya 4 fəsildə də özünü göstərə bilir.

Çox vaxt analar deyir ki, uşaq qaçanda, fiziki təzyiq olanda öskürməyə başlayır. Bu zaman allergiya barədə düşünülməlidir.

Allergiya zamanı əlamətlər nisbətən fərqlənir. Məsələn, bu zaman öskürək quru, inandcı, tutma şəklində olur. Allergiya öskürəyi bəlğəmlə, qızdırma ilə, çox güclü halsızlıqla müşahidə olunmur.

Allergik öskürək zamanı sadəcə öskürək, xırıltı, boğulma tutması və fit verici tənəffüs özünü göstərir.

Allergik burun axması adətən günün səhər saatlarında artır, şəffaf rəngdə olur, burun qaşınma və ard-arda asqırma ilə müşayiət olunur.

Allergiya bir az irəliləsə və aşağı tənəffüs orqanlarına qədər sirayət etssə, tənəffüs yollarında klinik simptomlar yaranar və bronxial astmaya qədər inkişaf edə bilər. Bu səbəbdən düzgün diaqnoz qoyulmalı və vaxtında müalicə aparılmalıdır."

Aygün Osmanlı

Telegramda izləyin