Sperma bankı Azərbaycanda bacı-qardaş evliliyinə yol açacaq? - AÇIQLAMA

Bir neçə gün əvvəl Azərbaycanda sperma bankının yaradılması ilə bağlı xəbər yayıldı. Yəni istənilən şəxsin süni mayalanma üçün könüllü şəkildə donor olması mümkündür. Əslində bu, gələcəkdə bacı-qardaş evliliyinə gətirib çıxara və beləliklə xəstə uşaqların dünyaya gəlmə ehtimalını artıra bilər. Süni mayalanma üçün donor olmaq nə dərəcədə doğrudur?

Məsələ ilə bağlı Sonxeber.az-a ginekoloq Rəşad Sultan açıqlama verib.

Onun sözlərinə görə, insanlar "malı mala qatırlar":

"Əksinə, sperma donorluğu bizdə süni mayalanma tətbiq olunmağa başlayandan var. İnsanlar sperma verirlər, yumurtası olmayan qadınların əvəzinə yumurta verirlər.

Bunlar onsuz da ölkəmizdə var və deyilən risklər, etik problemlər, bacı-qardaş evliliyi ehtimalı zatən var, çünki bir insan bir neçə ailəyə sperma və ya yumurta verir.

Sperma bankı sadəcə bu işlərin mərkəzləşdirilməsi deməkdir. Tam tərsi, adını çəkdiyimiz problemlərin olmaması, bir mərkəzdən idarə olunması üçün sperma bankı yaradılır. Yəni bu qərar sadalanan problemlərin həll etmək üçün qəbul olunub və həllinə də gətirib çıxracaq.

Ona görə də iki fərqi anlayışı bir-birindən ayırmaq lazımdır. Tənqid edənlər sperma, yumurta donorluğunu tənqid edə bilərlər. Bu onların şəxsi fikridir və bu barədə müzakirə aça bilərik.

Amma bir çox ölkələrdə donorluq qadağandır. Məsələn, Türkiyədə donorla süni mayalanma yoxdur. Bu, ayrı bir mövzudur. Amma bizim ölkəmizdə bunu qadağa edən bir qanun yoxdur, Donorluq varsa, o zaman bunu bank şəklində yaradılıb, tək mərkəzdən idarə etmək ən doğrusu olardı".

ZAİRA AKİFQIZI

Telegramda izləyin