Azərbaycanda palata yoldaşını öldürən şizofren azadlığa BURAXILDI - TƏFƏRRÜAT

Maştağada yerləşən Respublika Psixiatriya Xəstəxanasında beş ay öncə baş vermiş cinayətlə bağlı məhkəmə araşdırması yekunlaşıb.

"Kriminalqafqaz"ın məlumatına görə, işə Bakı Ağır Cinayətlər Məhkəməsində baxılıb və ötən həftə hökm çıxarılıb.

Xatırladaq ki, 2021-ci il dekabrın 3-də paranoidal şizofreniyadan əziyyət çəkən iki xəstə - Emil İbadov və Elvin Həsənov dalaşıblar. Onların mübahisəsi yorğana görə olub. Belə ki, Emil Elvindən yorğanını istəyib. Elvin buna etiraz etdiyindən Emil onu döyməyə başlayıb. Ağır xəsarətlər alan Elvin Həsənov 13 gün sonra Neyrocərrahiyyə Xəstəxanasında vəfat edib.

Elvin Həsənovun anası məhkəmədə bildirib ki, oğlu 17-18 yaşlarından qeyri-adekvat hərəkətlər etməyə başlayıb və mütəmadi olaraq ona iynə vurulub:

"Həyat yoldaşım vəfat edəndən sonra Elvin daha da aqressivləşdi. Evdəki əşyaları qırmağa başladı. Onu Maştağadakı Psixiatriya Xəstəxanasına yerləşdirdik. Bir müddətdir ki, orada müalicə alırdı. Elvinin döyülməsi xəbərini mənə səhəri gün dedilər. Eşitdim ki, Elvinlə eyni palatada müalicə alan digər xəstə ona xəsarət yetirib. Mən xəstəxanaya gedəndə Elvin komada idi, elə orada da vəfat etdi".

Anası deyir ki, Elvin əşyaları sındırar, qışqırar, əsəbiləşər, lakin heç kimi vurmazmış. Həsənovun müalicə müddətində də kiminləsə münaqişə yaşaması barədə ona məlumat verilməyib.

"Oğlumu aqressiv xəstə ilə bir palatada saxlayıblar və onlara nəzarət olunmadığından bu hadisə baş verib. Xəstəxana işçiləri səhlənkarlığa görə cəzalandırılmalıdırlar", - vəfat edən Elvinin anası belə düşünür.

İstintaq dövründə xəstəxana işçiləri ilə bağlı səhlənkarlıq və cinayət barəsində xəbər verməmə ittihamları ilə cinayət işinin başladılması tələb olunub. Lakin istintaq orqanı işçilərin əməllərində cinayət tərkibi olmadığı qənaətinə gəlib. Onlara qarşı cinayət təqibinin başlanması rədd edilib.

Xəstələrdən məsul olan tibb bacılarından biri məhkəmədə deyib ki, şöbədə 70-80 nəfər xəstə müalicə alır və onlar xəstələrin dərmanları vaxtında qəbul etməsinə, xəstələrə qulluq edilməsinə nəzarət edirlər:

"Emil və Elvini həmişə nəzarətdə saxlasaq da, ətrafa zərər verirdilər. Aqressiv olduqları üçün nəzarət otağına yerləşdirmişdik. Ədalət həkimin müəyyən etdiyi qrafikə uyğun olaraq, Elvinə və Emilə iynə vurulmuşdu. Ayın 3-ü mən evdə olanda gecə zəng gəldi ki, Emil Elvinə xəsarət yetirib. Digər xəstələrə də hücum çəkmək istədikləri üçün nəzarət otağına yerləşdirilmişdilər".

"Mən axşam evdə olarkən bildirdilər ki, Emil Elvini vurub. Palatanın kamerasına baxdıqda hadisənin necə baş verdiyini gördüm. Emil Elvindən yorğan istəyir. Elvin yorğanı vermədiyi üçün Emil ona yumruq və təpiklə xəsarətlər yetirir", - xəstəxananın şöbə müdiri Ədalət həkim məhkəmədə bu fikirləri səsləndirib.

O, iki aqressiv xəstənin nəyə görə eyni otaqda yerləşdirilməsi məsələsinə isə: "İmkanlar məhdud olduğu üçün hər xəstəni ayrı otaqda yerləşdirmək mümkün deyildi", - cavabını verib.

Məhkəmə Emil İbadovu Cinayət Məcəlləsinin 126.3-cü (ehtiyatsızlıqdan zərərçəkmiş şəxsin ölümünə səbəb olduqda) maddəsi ilə mühakimə edib. Məhkəmə-Psixiatrik Ekspertiza Mərkəzi rəy verib ki, Emil İbadov hadisəni anlaqsız vəziyyətdə törədib. Bu səbəbdən məhkəmə 41 yaşlı Emil İbadovu məsuliyyətdən azad edib. Hökmə əsasən, E.İbadov barəsində ixtisaslaşdırılmış psixiatriya stasionarında intensiv müşahidə altında məcburi müalicə tətbiq edilib.

Telegramda izləyin