Uşaqlar zənginlik və şöhrətin təbliğatının qurbanına çevirilir - Hacı Şahin intiharlardan danışdı

"Sevginin, insanın ali bir varlıq olmasına inamın olmadığı bir mühitdə intihar sayının artması təbiidir".

Bunu Bakupost.az -a açıqlamasında ilahiyyatçı, Qafqaz Müsəlmanları İdarəsinin nümayəndəsi Hacı Şahin Həsənli deyib.
Onun sözlərinə görə, intihar sosial problemlərdən daha çox həyata yanlış baxışın, mənəvi boşluğun nəticəsidir:

"Problemin həll yolunu tapmaq üçün onun səbəblərini bilmək gərəkdir. Səbəb aradan qaldırıldıqda problem də həllini tapar. İntihar bağışlanmaz və böyük günahlardandır. Çünki onun səbəbi ən böyük nemət olan həyata qarşı sayqısızlıq və naşükürlükdür. Quran da bizə fundamental bir sual verir: məgər insan naşükürlükdən başqa nəyinsə cəzasını çəkirmi?

Bunca fürsət və imkanları görməmək həyata və bu həyatı bizə bəxş edən yaradana qarşı hörmətsizlikdir. Özü də həyatda qalmaq üçün insanın instinktləri var, insan yaşamağa kodlaşdırılıb. Bu instinkt bir-iki günə zəifləyə bilməz, bu, uzun illərin nəticəsidir. Həyat bir anın içində qaralmır gözümüzdə, bu, davamlı bir prosesdir və iç dünyamızla əlaqəlidir. Məyus olduqca iç dünyamız qaralır, nəticədə həyata da maraq itir, özümüzdən ümidimiz kəsilir, sonda Allaha da inamımız aradan gedir. İntihar bu mənəvi halın fiziki təzahürüdür. İntihar hamını özünə borclu bilən insanın hamıdan intiqam almaq cəhdidir həm də. Yəni "mənim qədrimi bilmədinizsə, mən də ölümümlə sizi cəzalandıracağam" məntiqi".

H.Şahin bildirib ki, intihar səbəblərindən biri də sevgi çatışmazlığıdır:

"Ona görə insanlararası, xüsusilə ailədaxili münasibətlərdə sevgi ən fundamental dəyərdir. Təəssüf, çoxları bunu ya anlamır, ya səhv anlayır.

Müasir mədəniyyət insanlara nə aşılayır? Uğur, zənginlik və şöhrət.

-Ancaq özünü düşün, tez qazanıb, tez məşhurlaşmağı düşün. Bunlar olmasa, həyat da yoxdur.

Təhsil də, əxlaq da, görkəm də, hətta ailə də özü özlüyündə insanı xoşbəxt edən amil kimi deyil, zənginlik və şöhrət əldə etmək vasitəsi kimi təbliğ olunur. Həm valideynlər, həm də övladlar bu təbliğatın qurbanına çevirilirlər. Ona görə, ailələr dağılır, övladlar səhv tərbiyə olunur, yeniyetmələr səhv seçimlər edir. Sevginin, insanın ali bir varlıq olmasına inamın olmadığı bir mühitdə intihar sayının artması təbiidir".

İlahiyyatçı intiharın uşaqlardan da yan keçmədiyini təəssüflə vurğulayıb:

"Əfsuslar olsun ki, bu mərəzin qurbanları artıq məsum uşaqlardır. Onların hələ həyat barədə doğru-dürüst təsəvvürləri belə yoxdur. Valideyn də, məktəb də, ümumiyyətlə bütün cəmiyyət bu yeniyetmələrin həyat barədə düzgün təsəvvürə malik olmamasında günahkardır.

Müasir gənc hansı təfəkkürlə həyata qədəm qoyur?

- Mən heç kəsə lazım deyiləm, hamının məndən gözləntisi var, amma heç kəs məni eşitmək istəmir.
Özünü tənha, lazımsız, yalnız başqalarının gözləntisini doğrultmaq üçün vasitə kimi başa düşən gənc həyatda hansı uğur əldə edə bilər?"

H.Şahin uğurlu və xeyirli övlad yetişdirməyin mühüm yollarına diqqət çəkib:

"Uşağa ilk yaşlarından aşılanmalıdır ki, o, hər bir halı ilə ailəsi üçün dəyərlidir: "Həyat çətindir, sənin uğur yolun uğursuzluqlardan keçir. Qalxmaq üçün yıxılacaqsan. Nəyisə seçəndə nədənsə məhrum olacaqsan. Amma bilməlisən ki, səni sevən və sənə dəstək verən Yaradanın var. Yıxılanda, ucalanda da onu unutma. O, səni sevib deyə yaradıb, sən varsansa, artıq sevilirsən. Onun üçün sənin qəlbin mühümdür, həyatda kim olacağın yox. Həyatda bütün peşələr, bütün sahələrdən faydalanmaq olar. Çalış kim olursansa, ol, faydalı ol. Bu işdə də ailən də, məktəb də, bütövlükdə cəmiyyət də sənə ehtiyac duyacaq. İstər küçə süpür, istər də nazir ol, sən hər bir halınla dəyərli və izzətlisən". Bütün bunları sözlə deyil, əməllə təsdiqləmək gərəkdir".

İlahiyyatçı əlavə edib ki, valideyn övladına nümunə olmalıdır:

"Valideyn özü şükür etməlidir ki, uşaq da bunu mənimsəsin. Valideyn ailədə bir çətinlik yarandıqda dava salmamalı, ailə dağıtmamalıdır ki, övlad çətinliyin öhdəsindən gəlməyin mümkünlüyünə inansın. Valideyn uşağını başqası ilə müqayisə etməməli, onu həmişə seçim etməyə öyrətməli, problemlərini müstəqil həll etməyə təşfiq etməlidir. Ən başlıcası da övladı üçün çəkdiyi əziyyətlər barədə danışmamalıdır, hər ağır durumda təbəssüm etməyi bacarmalıdır. Bütün bunlar kiçik görünsə də, insanın həyata baxışını formalaşdırır və onun gələcəyini müəyyən edir. İntihar sosial problemlərdən daha çox bu amillərin nəticəsidir".

Telegramda izləyin