"Azərbaycan valideynləri beyin ölümü keçirmiş övladının orqanlarını bağışlamağa hazır deyillər"- Adil Qeybulla

Maliyyə naziri Samir Şərifov bildirib ki, Azərbaycanda orqan transplantasiyası üçün ayrılan vəsait artırılacaq.

Bununla bağlı Sonxeber.az-a açıqlama verən həkim-ekspert Adil Qeybulla bildirib ki, vəsaitin artırılması müsbət addım olsa da, məsələnin kökündə başqa problem var:

"Birincisi orqan köçürülməsi məsələsini fundamental həll etmək üçün gərək səhiyyə bir sistem şəklini alsın. Bu olmasa, proses öz real həllini tapmayacaq. Əlbəttə, maliyyənin artırılması çox yaxşı addımdır, çünki səhiyyə xərc tələb edən sahədir və bu, əvəzsiz, yəni həmişə dövlətin çiynində yüksələn xərcdir.

Amma belə bir sual ortaya çıxır ki, donor bankını necə yardacağıq? Donor bədəni sağlam, lakin beyin ölümü keçirmiş, nisbətən gənc insanlardan alınır. Azərbaycan valideynləri beyin ölümü keçirmiş övladının orqanlarını bağışlamağa hazır deyillər. Bunun üçün cəmiyyətin düşüncəsi dəyişməli, beyinlərdə inqilab getməlidir. İnsan başa düşməlidir ki, həyatını itirməkdə olan kəs başqa bir həyata başlanğıc verə bilər. Bu humanizm fikri insanlara təbliğ olunmayınca məsələ həllini tapa bilməz.

İkinci bir mühüm məsələ səhiyyəni sistemləşdirməklə bağlıdır. Bir rayonda beyin ölümü keçirən şəxs qeydə alınıbsa, başqa bir rayonda da həmin orqana ehtiyac varsa, bunu vaxtında çatdırmaq lazımdır. Bunun üçün də növbəlilik sistemi olmalıdır. Kriminala yol aça biləcək məqamlar olmamalıdır. Yəni bu işin infrastrukturunu yaratmadan orqan köçürməni effektiv həyata keçirmək mümkün deyil.

Ola bilər ki vəsaitin ayrılması ilə bu əməliyyatların sayı çoxalsın, donor banklarını qurmaq, müəyyən avadanlıqlar almaq mümkün olsun. Amma məsələnin həlli təkcə vəsait deyil. Qeyd etdiyim problemlər öz həllini tapmaldır".

Şəbnəm Lətifi

Telegramda izləyin