Qazilər intihar edir - Problemin həlli nədədir? - AÇIQLAMA

Təəssüf ki Qarabağ uğrunda gedən döyüşlər zamanı yaralanan, psixoloji sarsıntı keçirən igidlərimizin hələ də ara-ara intihar xəbərlərini eşidirik. Görünür, bu istiqamətdə görülən işlər, yardımlar yetərsizdir. Bu gün hansı tədbirlər görülməlidir ki, qazilərimiz intihara əl atmasınlar?

Mövzuyla bağlı Sonxeber.az-ın suallarını millət vəkili Razi Nurullayev cavablandırıb.

O bildirib ki, Azərbaycanda ümumiyyətlə "psixoloq", "psixiatriya" deyəndə hər kəs düşünür ki, insan dəli olanda həmin həkimin yanına gedir:

"İnsanlar hesab edirlər ki, psixoloqa, psixiatra ancaq dəli olanlar müraciət edir və kimsə də getsə, ayıb sayılacaq. Amma bütün dünyada da bu belədir ki, stress keçirmiş, şok yaşamış insanlar həmişə psixoloq xidmətindən istifadə edirlər.

Çox təəssüflər olsun ki, Azərbaycanda müharibə iştirakçılarına lazımi psixoloji xidmət göstərilmədi. Onlara bu xidmətlərin göstərilməsi çox yaxşı olardı. Xüsusən, yaşlılar var idi ki, psixoloji durumları lap pis idi. Onları müəyyən xəstəxanalara təhkim edib, müəyyən həkimlər vasitəsilə daim nəzarətdə saxlamaq lazım idi. Hər gün sosial işçi onlarla görüşməli, danışmalı, fikirlərini öyrənməli idi. Bəlkə də, dövlət tərəfindən onların fikirlərini dağıdacaq, stresdən qurtaracaq təkliflər edilə bilərdi. Məsələn, həmin şəxsləri turla harasa aparmaq olardı.

Əslində bunların hamısı olmalı idi. Mən bununla bağlı çox danışdım, amma təəssüflər olsun ki, təkliflərim yerinə yetirilmədi. Bu məsələlər intiharların qarşısını bir qədər də olsa, ala bilərdi".

Aysel SƏFƏRZADƏ

Telegramda izləyin