"Azərbaycan və Özbəkistan arasında informasiya mübadiləsi genişlənəcək"- Qulu Məhərrəmli

Dünən Daşkənddə Özbəkistanın İnvestisiya və Xarici Ticarət Nazirliyinin, Azərbaycanın İqtisadiyyat Nazirliyinin dəstəyi, İxracın və İnvestisiyaların Təşviqi Agentliyinin (AZPROMO), Özbəkistan Ticarət və Sənaye Palatasının birgə təşkilatçılığı ilə Daşkənddə Özbəkistan-Azərbaycan biznes forumu keçirilib. Biznes forum çərçivəsində iki ölkənin müvafiq qurumları arasında bir sıra sənədlər imzalanıb. Bunların arasında Azərbaycan Respublikasının Medianın İnkişafı Agentliyi də yer alıb.

Bununla bağlı Sonxeber.az-a açıqlama verən əməkdar jurnalist Qulu Məhərrəmli bildirib ki, söz və mətbuat azadlığının inkişafı baxımından Azərbaycanın Özbəkistana təsir imkanları daha çoxdur:

"Ümumiyyətlə, türkdilli respublikalar arasında, xüsusilə də mədəniyyət sahəsində əlaqələrin genişlənməsi çox yaxşıdır. Media sahəsində də memorandumun imzalanmasının müsbət cəhəti odur ki, biz Özbəkistanın daxili həyatında nə baş verdiyindən xəbər tuturuq. Özbəkistanla müqayisədə Azərbaycan mətbuat azadlığı sahəsində çox böyük uğurlar əldə edib. Bizdə müxtəlif siyasi təmayüllü media var, internet azaddır. Hesab edirəm ki, söz və mətbuat azadlığının inkişafı baxımından Azərbaycanın Özbəkistana təsir imkanları daha çoxdur, nəinki bunun əksi.

Memorandumun müsbət tərəfi budur ki, tərəflər bir-birindən informasiya ala biləcək. Regional, geostrateji, geosiyasi məsələlərdə tərəflərin üst-üstə düşən maraqları var və bu maraqlardan birgə çıxış edə biləcəklər. Önəmli olan budur ki, qardaş və dost ölkələr arasında informasiya mübadiləsi genişlənəcək".

Şəbnəm Lətifi

Telegramda izləyin