"İki türkdilli respublikaların bundan sonra daha intensiv fəaliyyətləri üçün uğurlu platforma açılır" - Bəhruz Quliyev

"Azərbaycanla Özbəkistan arasında baş tutan biznes forumu çərçivəsində digər sahələrlə yanaşı medianın da diqqətə alınması ilk növbədə ölkələrimizin informasiya mübadiləsinə, habelə mətbuatlarımızın sıx əlaqəsinə öz töhfələrini vermiş olacaq".

Bu fikirləri Sonxeber.az-a "SƏS" qəzetinin baş redaktoru Bəhruz Quliyev mövzu ilə bağlı açıqlamasında bildirib.

Onun sözlərinə görə, həm Azərbaycanın Medianın İnkişafı Agentliyinin, həm də Özbəkistan Prezidentinin Administrasiyası yanında İnformasiya və Kütləvi Kommunikasiya Agentliyinin birgə əməkdaşlıqları iki türkdilli dövlətlərin çoxşaxəli əməkdaşlıq mühitinə əlavə impulslar verəcək:

"Nəzərə alsaq ki, bu gün Özbəkistan yerləşdiyi Orta Asiya regionunun aparıcı dövlətlərindən biri olması ilə yanaşı həm də iqtisadi, sənaye və hərbi-strateji mühitdə önəmli yer tutur. Eləcə də Azərbaycanın Cənubi Qafqaz regionunda danılmaz liderlik mövqeyi mövcuddur. Bu zaman hər iki türkdilli respublikaların bundan sonra daha intensiv fəaliyyətləri üçün uğurlu platforma açılacaq. Məhz bu platformaları təqdim edən mühüm sahələrdən biri də mətbuatdır. Hesab edirəm ki, ölkələrimizin media agentliklərinin daha sıx əməkdaşlıqları qarşıdakı zamanlarda jurnalistlərimizin paralel əməkdaşlıq sferasına öz münbit təsirlərini göstərəcək. Yəni əməkdaşlıq sənədinin imzalanması bu kimi çoxsaylı uğurları, rentabelli münasibətləri ehtiva etməkdədir".

"SƏS" qəzetinin baş redaktoru eyni zamanda iki türkdilli medianın ortaq maraqlara səmərə verəcəyini vurğulayıb:

"Əbəs deyil ki, hər iki ölkənin dövlət başçılarının səsləndirdikləri bəyanatları və xüsusilə imzalanan Bəyannamə bütövlükdə qarşıda dayanan çağırışların uğurla icra edilməsinə zəmin yaradır".

Telegramda izləyin