Müasir Azərbaycan filmləri niyə izlənilmir? - AÇIQLAMA

Yarandığı gündən insanların dünyagörüşünü formalaşdıran, hər bir xalqın tarixini, milli adət-ənənəsini yaşadan, həyatın bütün sahələrinə nüfuz edən kino sənəti bəşəriyyətin ən böyük kəşfidir. Kino yeganə sənət növüdür ki, özündə mədəniyyətin bir neçə sahəsini birləşdirir. Kinonun bir üstünlüyü də əyaniliyindədir, inandırma gücünə və təsirə malik olmasındadır.

Azərbaycan kinoları xalqımız tərəfindən hər zaman sevilərək izlənilir. Amma hər kəsə bəllidir ki, müasir filmlərlə müqayisədə keçmiş kinoların tanınması, izlənməsi daha zəifdir. Bəs müasir filmlərin retro kinolarımız qədər izlənilməməsinin səbəbi nədir?

Mövzu ilə bağlı Sonxeber.az saytına Azərbaycan Kinematoqrafçılar İttifaqı mətbuat katibi Əli Cabbarov açıqlama verib.

O bildirib ki, Azərbaycan televiziyaları milli kinolarımızı kifayət qədər təbliğ etmir:

"Ölkəmizdə televiziyaların sayı azdır, ən azı 3 dəfə artırılmalıdır. Xalqın qəlbinə yatmış filmlər dəfələrlə televiziyada göstəriləndən sonra insanların yaddaşına həkk olunur. Bizim 10 milyonluq əhalimiz var. 10 milyonluq əhalimizə yeni yerli kinoları daha çox göstərməliyik ki, insanlar kinolarımızı tanısınlar. Kinoteatrlarda milli kinolara yer az ayırırlar, satış az olur. Mədəniyyət Nazirliyinin aiddiyyatı şöbəsi bununla bağlı tədbir görməlidir. Məsuliyyəti kinoteatrlar və telekanallar daşıyır.

Müasir Azərbaycan filmi hazırda beynəlxalq sferalara çıxır. "Nar bağı" filmi beynəlxalq mükafat alıb. Türkiyədə televiziyada göstərilsə belə, bizdə efirə getmir. Yeni Azərbaycan filmlərini təəssüf ki təbliğ eləmirlər. Azərbaycan filmlərinin nümayişi daha çox gedərsə, bir o qədər tanınar".

AYSEL QULİYEVA

Telegramda izləyin