Kişilər hansı səbəbdən falçıya gedirlər? – ARAŞDIRMA

"Bir insanı ikinci dəfə falçıya getməyə vadar edən səbəb ilk görüşdə falçının ona verdiyi
ümiddir".
Bu fikirləri Sonxeber.az-a dörd dəfə falçıya müraciət edən Elçin Qəhrəmanlı (ad şərtidir)
bildirib.
"Falçıya getmək" deyəndə hamımızın ağlına qadınlar gəlir. Lakin araşdırma göstərir ki,
falçıya gedən kişilər də az deyil. Qadınların əsasən evlilik, sevgi məsələsinə görə falçıya
müraciət etməsi məlumdur. Bəs kişilər hansı səbəbdən falçıya gedir?
Elçin Qəhrəmanlı(ad şərtidir) : "Bir gün dostum dedi ki, yəhudi qadın falçı tanıyıram.
İşlərim düz getmirdi, onun yanına gedəndən sonra hər şey qaydasına düşdü. Məndə də
maraq yarandı. Əslində mənim problemim yox idi. Sırf maraq üçün getdim və gördüm ki,
şəhərin yarısı oradadır. Birinci mərtəbədən ikinci mərtəbəyə qədər insanla dolu idi və
gözləyənlərin hamısı qadınlar idi. Tək kişi mən idim. İlk öncə utandım və oranı tərk
etdim. Amma maraq məndən əl çəkmirdi. Falçını görməli idim. Üç gün sonra yenidən
getdim. Bu dəfə axşam getdim ki, bəlkə növbə olmaz. Bu dəfə 3 nəfər vardı. Biri içəridə
idi, ikisi növbə gözləyirdi. Növbə mənə çatdı. İçəri girdim. 50 yaşlarında qadın idi.
Proqnozlarının heç biri düz çıxmadı. Amma ikinci dəfə ona şans verdim. Bir insanı falçı
yanına getməyə vadar edən səbəb ilk görüşdə falçının ona verdiyi ümiddir. O falçı da
belə edirdi. İnsanlara ümid verirdi və onları özündən asılı hala salırdı. İkinci görüşdən iki
ay sonra yenə getdim. Kişilər də qadınlar qədər olmasa da falçıya gedirlər. Amma
qadınlardan fərqli olaraq kişilər sevgi, evlilik məsələsinə görə müraciət etmirlər. Kişilər
daha çox filan işi görsəm xeyir taparammı? kimi suallara cavab tapmaq üçün gedirlər.
Üçüncü dəfə gedəndə orda bir kişi var idi. Falçıya "Moskvaya gedim ya getməyim" deyə
gəlmişdi".

Bir neçə dəfə falçıya gedən Nazim Həsənli ancaq səhhətində olan problemə görə
falçıya getdiyini deyir: "Səhhətimdə problem var idi. Getmədiyim həkim qalmadı. Heç
kim diaqnoz qoya bilmirdi. İnsanın canı ağrıyanda bilmir nə etsin və çarəsiz qalır.
Falçıya getdim, lakin o da əlac tapa bilmədi. Sonda bir tibb elmləri doktoru,nevropotoloq
düzgün diaqnoz qoydu. Xəstəliyim panik atak idi. Falçıya getmək istəyənə məsləhət
görmürəm, pulları batacaq".

Azad Kərimov evlilik məsələsinə görə falçıya üz tutduğunu deyir: "Kəndimizdə məşhur
falçı var. Tanışımdır. Əslində bizim kənddə elə insanlara falçı yox molla deyirlər. Fal
üçün yox, tanış olduğu üçün qonaq getmişdim. Qardaşım evlənmirdi. Söz düşdü, dedim
ki, qardaşım üçün kitab aç. O da açdı, yazdı-pozdu, dedi ki, bu duanı başının altına qoysun, evlənəcək. Mənə də baxdı və dedi ki, göz dəyib. Amma deyəsən özünün gözü
dəydi. Axşam yuxuda başı öküz bədəni insan kimi varlıqlar gördüm".

Psixoloq Taryel Faziloğlu kişilərin falçıya getməsinin səbənini üç əsas amildə görür:
"Kişilərin falçıya getməsinin 3 əsas səbəbi var. Birincisi ənənəvi-mentaldır. İnsanlar
uşaqlıqdan bəri qohumlarının, ailə üzvlərinin falçıya getdiyini görüb-eşidirlər və bunu
normal qəbul etmələrinə gətirib çıxarır. İkinci sosial səbəbdir. Onların sosial çevrəsində
falçıya inanc olur və bu inancı onlara təlqin edirlər. Ən əsas və psixoloji səbəb isə
insanların, əsasən də kişilərin özünəgüvənsizliyidir. Bir iş görmək istədikdə və ya
müəyyən bir gərginlik yaşayanda özlərinə təskinlik, motivasiya axtarırlar. Bununla da
falçıların tələsinə düşürlər. Falçılar onlara eşitmək istədikləri sözləri deyirlər və özlərinə
bağlayırlar. Kişilər əsasən iş-karyera, xəstəlik qorxusu və çox az qismi sevgi-ailə
mövzusuna görə falçıya gedirlər".
Sosioloq Lalə Mehralı kişilərin əsasən iş-biznes səbəbindən falçıya getdiyini bildirir:
"Azərbaycanda ən məşhur özünü falçı, cadugər, ekstrasens adlandıranlara fikir versək
görərik ki, onlar kişi cinsinin nümayəndələridir. Bu digər millətlərdə də belədir. Əgər
kişilər falçılıq edə bilirsə, onların falçıya getməsi də bizi təəccübləndirməməlidir. Kişilər
falçı vədinə inanmağa daha çox meylli olurlar. Onlar əsasən gələcək iş-biznes planları
üçün falçıya gedirlər".

Şəbnəm Lətifi

Telegramda izləyin