Sığorta, yoxsa yolaverdi? - Səhiyyəmizin Bermud üçbucağı - REPLİKA

Bu günlərdə bir narahatlıq yaşadım və fikirləşdim ki, həkimə getməliyəm. Hər ay maaşımızdan sığorta ödənişləri üçün xeyli məbləğ tutulur. Ona görə özəl klinikada yox, elə sığorta xəttimlə müayinə planlaşdırdım. Amma sən saydığını say gör, bizim səhiyyə sistemimiz nə sayır.

İlkin diaqnozu dəqiqləşdirmək üçün KT (kompüter tomoqrafiyası) və MRT (maqnit-rezonans tomoqrafiyası və ya nüvə-maqnit-rezonans tomoqrafiyası) kimi dəqiq və müasir müayinə aparatları var, mən də üz tutdum qeydiyyatda olduğum xəstəxanaya. Üz tutduğum klinikada və digər dövlət xəstəxanalarında bu aparatlara rast gəlmədim, özəl xəstəxanalarda isə KT müayinəsi 90, MRT müayinəsi 165 manatdır. Çox gəzəndən sonra, dövlət xəstəxanalarından birində axtardığımı tapdım. Dedilər KT də var, MRT-də, amma həkimlər məzuniyyətə çıxıb.

Son aylar hansı xəstəxanaya sığorta xətti ilə müraciət etsəm və edənlərdən soruşsam da aldığımız cavab eyni olub: Rentgen, USM, KT və MRT mütəxəssisləri "məzuniyyətə çıxıblar". Bəs, əvəz edən yoxdurmu? Yox. Ölkədə bu qədər iş axtaran var, bu qədər mütəxəssis "iş yeri" deyib dad edir, amma bizdə məzuniyyətə gedən həkimi əvəzləyən həkim yoxdur. Həkim yerində olsa belə, sən müayinə qurğusuna düşmək üçün gərək onun gözü qarşısında can verəsən. Əks halda, "səndə heç nə yoxdu" deyib yola verirlər. Sözün həqiqi mənasında başdan edildiyini anlayırsan.

Ölkədə tanınmış bir həkim dostum var, ona giley-güzar edəndə dedi ki, sağlamlığının qayğısına qalmaq istəyirsənsə, özəl xəstəxanaya get, pulunu ver, müayinə olun. "Biz həkimlər qalmışıq Səhiyyə Nazirliyi, TƏBİB və sığortanın arasında. TƏBİB sığortaya görə vəd edilmiş maaşları vermir. Həkimlər 3 qurumun arasında çaş-baş qalıblar, hamı əmr edir, heç kim sahiblənmir. Ona görə çoxu üz tutub özəl klinikalara. Dövlət xəstəxanasında olanlar xəstələri ya tələbələrinin ümidinə qoyurlar, ya tibb bacılarının".

İnandım. Çünki öz başıma gəlib, həm də bir neçə dəfə. Ötür-ötür oyunu gedir. Xəstəni bezdirirlər, çıxıb gedir.

Səhiyyəmiz dönüb olub Bermud üçbucağı. Düşən çıxa bilmir, çıxan da bir şey anlamır, başını itirir. Anlamaq, səhvim varsa, düzəltmək istədim. Üz tutdum Səhiyyə Nazirliyinin mətbuat xidmətinə. Di gəl, mətbuat xidməti sanki Tanrı qapısıdır. Eşidir, amma cavab vermir. Nə edək? Keçək gücləndirilmiş dua rejiminə?/lent.az

Telegramda izləyin