"Tovuz döyüşləri xalq və Prezident, xalq və ordu birliyinin yenidən təcəssümünə çevrildi" - Deputat

Bu gün Tovuz döyüşlərinin başlanmasından iki il keçir.

Bununla bağlı Sonxeber.az-a danışan deputat Cavanşir Paşazadə bildirib ki, Tovuz döyüşləri Qarabağ problemlinin həllinin və möhtəşəm Zəfərin başlanğıcı oldu və ərazi bütövlüyümüzün bərpasının bünövrəsi Tovuz döyüşləri ilə qoyuldu:

"Ordumuzun Böyük Qələbəyə doğru irəliləməsi 2016-cı il şanlı Aprel döyüşlərindən, 2018-ci il Naxçıvanda uğurlu Günnüt əməliyyatından, 2020-ci il Tovuz döyüşlərindən keçdi. Xüsusilə, atəşkəsin imzalanmasından 22 il sonra başlanan Aprel döyüşlərində Azərbaycan ordusunun bölmələri əks-hücum əməliyyatı nəticəsində Ermənistan hərbi birləşmələrinə ağır zərbələr vuraraq məğlubiyyətə uğratdı. Bununla da "yenilməz" Ermənistan ordusunun mifi darmadağın oldu. Tovuzda baş verən hərbi təxribat Azərbaycan xalqının ayağa qalxaraq, yumruq kimi birləşməsinə təkan verdi. Tovuz döyüşləri həm Azərbaycan ordusunun gücünü göstərdi, həm də Ermənistanın yalanlarının beynəlxalq aləmdə üzə çıxmasına şərait yaratdı. Tovuz döyüşlərində ordumuzun əsgər və yüksək rütbəli zabitləri qəhrəmanlıqla erməni işğalçılarının təxribatlarının qarşısını qətiyyətlə aldılar. Xalqımız düşmən təxribatlarının qarşısını igidliklə alan və şəhid olan, vətənimizin mərd oğulları general-mayor Polad Həşimovu, polkovnik İlqar Mirzəyevi, mayor Namiq Əhmədovu, mayor Anar Novruzovu, baş leytenant Rəşad Mahmudovu, gizir İlqar Zeynalovu, gizir Yaşar Babayevi, baş çavuş Vüqar Sadıqovu, çavuş Elçin Mustafazadəni, çavuş Nazim İsmayılovu, baş əsgər Elşad Məmmədovu və əsgər Xəyyam Daşdəmirovu böyük izdihamla son mənzilə yola saldı. Ən önəmlisi isə, Tovuz döyüşlərində şəhid olan qəhrəmanlarımızın qisası 44 günlük Vətən müharibəsində layiqincə alındı".

Deputat vurğulayıb ki, Tovuz döyüşləri xalq və Prezident, xalq və ordu birliyinin yenidən təcəssümünə çevrildi:

"Tovuz döyüşləri və 44 günlük Vətən müharibəsi sübut etdi ki, Ermənistan ordusu Azərbaycan əsgərinin qarşısında aciz və zəifdir. Tovuz döyüşləri göstərdi ki, Ermənistanın hərbi təcavüzü nəticəsində yaradılmış Dağlıq Qarabağ münaqişəsinin həlli, ölkəmizin ərazi bütövlüyünün və əhalinin təhlükəsizliyinin təmin olunması, erməni təxribatlarının qarşısının alınması istiqamətində cənab Prezident İlham Əliyevin yürütdüyü siyasəti millətimiz qətiyyətlə müdafiə edir. Məhz buna görə həmin vaxt dünyanın müxtəlif ölkələrində yaşayan azərbaycanlılar dövlətimizin yanında oldular, soydaşlarımız oradakı erməni səfirlikləri qarşısında aksiya və mitinq keçirərək ordumuza dəstək oldular.

Düşünürəm ki, Tovuz döyüşlərinin bitməsi ilə Azərbaycan tarixində yeni bir səhifə açıldı. Ən önəmlisi isə odur ki, 30 il ərzində bizə qarşı ikili siyasət yürüdən beynəlxalq təşkilatlar tərəfindən dondurulmuş Qarabağ probleminin həllinə inam artdı. Bu gün ərazi bütövlüyümüz Ali Baş Komandan İlham Əliyevin başçılığı ilə Müzəffər Azərbaycan ordusu tərəfindən bərpa edilib və o torpaqlarda yenidənqurma işləri uğurla davam etdirilir".

Aysel Yusifqızı

Telegramda izləyin