"YAP Heydər Əliyevin şah əsəridir" - Aydın Hüseynov

"Yeni Azərbaycan Partiyasının yaranmasını şərtləndirən amilləri sadalasaq ilk öncə o dövrdəki ictimai-siyasi, hərbi, iqtisadi vəziyyəti göz önünə gətirmək lazımdır. Bəs, o dövrdə nə baş verirdi, yeni siyasi qüvvənin siyasət meydanında olması nələri dəyişə bilərdi? Əsas məsələ də buradadır. Həm də həmin siyasi qüvvəyə kim rəhbərlik edəcəkdi? Bu, çox önəmli idi. Çünki o dövrdə hər gün göbələk kimi zühr edən partiya və hərəkatlar ölkədə baş verən hadisələrin idarəedicisinə, ağır yükün altına girərək Azərbaycanın xilasedicisinə çevrilə bilmirdi".

Bunu Sonxeber.az-a danışan deputat Aydın Hüseynov bildirib.

Deputat qeyd edib ki, təcrübəsizlik, dövlətçilik, idarəçilik səriştəsinin olmaması ölkədə xaosu bir az da dərinləşdirirdi:

"Təbii ki, xarici müdaxilələr fonunda baş verən hadisələri, ölkəni bürümüş etiraz dalğasını nizamlamaq, problemlərin həlolində avanqard rolu yalnız bu çətinliklərin öhdəsindən gələ bilmək bacarığı yalnız bir şəxsdə var idi – Naxçıvan Ali Məclisinin sədri Heydər Əliyevdə".

A.Hüseynov bildirib ki, müxalifət partiyası kimi yaranan Yeni Azərbaycan Partiyası cəmi 6 aydan sonra iqtidar partiyasına çevrildi:

"Heydər Əliyevin nüfuzu, siyasi çəkisi, dünya dövlətlərində kifayət qədər tanınması, bacarığı, dövlətin idarə olunmasında qazandığı təcrübə onun yenidən hakimiyyət sükanı arxasına keçməsini şərtləndirdi. 91 nəfər ziyalının Ulu Öndərə müraciəti əslində milyonlarla azərbaycanlının səsi idi. Hətta o vaxtkı hakimiyyətdə təmsil olunanlar Heydər Əliyevin hakimiyyətə gəlməsində daha çox maraqlı idilər. Çünki, səriştəsizlikləri səbəbindən ölkənin hansı dərinlikdə uçuruma düşürdüklərini anlamağa başlamışdılar. Halbuki, xalqımız, xüsusən də hakimiyyəti zorla ələ keçirən AXC-Müsavat təmsilçiləri Ulu Öndərin hakimiyyətə daha tez gəlməsinə əngəl törətməsəydilər nə gənc ölkəmiz iqtisadi cəhətdən tənəzzülə uğrayar, nə cəmiyyətdə xaos baş verər, nə də Ermənistanın təcavüzü genişlənər və torpaqlarımız işğal olunmazdı. Bütün bunların günahı elə keçmiş hakimiyyətin səriştəsiz, cinayətkar üzvlərindədir. Heydər Əliyev Mərkəzində Yeni Azərbaycan Partiyasının yaradılmasının 30 illiyi münasibətilə keçirilən tədbirdə çıxış edən Azərbaycan Prezidenti, Yeni Azərbaycan Partiyasının Sədri İlham Əliyev bildirdiyi kimi, Heydər Əliyev tərəfindən dövlətin ağır problemlərinin, yükünün bir hissəsini öz üzərinə götürmək böyük məsuliyyət tələb edən addım idi. Çünki o vaxt, bir daha demək istəyirəm, ölkədə gedən proseslər çox narahatedici idi və Azərbaycanın görkəmli nümayəndələrinin məhz Heydər Əliyevə müraciət etməsi bu zərurətdən doğurdu. Çünki ölkə artıq idarəolunmaz vəziyyətə düşmüşdü, bir il ərzində dövlətçiliyin əsasları qoyulmamışdı, demokratik inkişaf ləng gedirdi, əslində, geriyə addımlar atılırdı. Biz təkcə senzuranın tətbiq edilməsini yada salsaq, demək kifayətdir ki, o vaxt demokratik mühitdən söhbət gedə bilməzdi. Yeni Azərbaycan Partiyasının təsis konfransının məhz Naxçıvanda keçirilməsi də buna bağlı idi".

Deputat bildirib ki, Ulu Öndər Heydər Əliyevə cəmiyyətdə inam çox yüksək səviyyədə idi:

"Heydər Əliyev hakimiyyətdə olduğu dövrdə həmişə xalqa xidmət edirdi. Hələ Sovet hakimiyyəti illərində Azərbaycan 1970-80-ci illərin əvvəllərində sovet məkanında ən geridə qalmış respublikadan ən qabaqcıl respublikaların birinə çevrildi. Bu da Heydər Əliyevin gərgin əməyi, fədəkarlığı, idarəetmə qabiliyyəti sayəsində oldu. Əgər Ulu Öndər 1987-ci ildə Moskvada Siyasi Büronun üzvlüyündən və ümumiyyətlə, hakimiyyətdən uzaqlaşdırılmasaydı Qarabağda separatist qüvvələr baş qaldıra bilməzdilər. Azərbaycanın xilaskarı xalqımızın ən çətin anlarında onun yanında oldu, özünün və ailəsinin həyatını təhlükəyə ataraq 20 Yanvar hadisələrinə etiraz əlaməti olaraq ölkəmizin Moskvadakı daimi nümayəndəliyinə gələrək dünya mediası qarşısında baş verən faciəyə kəskin etirazını bildirdi, Qorbaçovu ittiham etdi. Məhz bu keyfiyyətdə olan siyasi xadim Azərbaycanın dar günündə hakimiyyət yükünün altına girməli idi və Yeni Azərbaycan Partiyasının sədri kimi xalqdan güc alaraq bütün çətinliklərə sinə gərdi, öz ömrünü xalqı yolunda fəda etdi. Bu gün Azərbaycan məhz Heydər Əliyevin əsasını qoyduğu ideoloji xətt üzərinə mətnlə addımlayır, inkişaf edir, 44 günlük müharibədə Zəfərə imza atır".

Telegramda izləyin