Bakıdakı məşhur taxta bazarı Vasif Talıbovdan alındı - FOTO

Naxçıvan Muxtar Respublikasının Ali Məclisinin sədri Vasif Talıbovla bağlı ard-arda gələn xəbərlər dayanmır. Məlum olur ki, Talıbovlar klanı 30 ildə yığdıqlarını itirməyə başlayırlar.

"Yeni Sabah"ın əldə etdiyi xəbərə görə, Vasif Talıbovun itirdiyi böyük obyektlərdən biri də Bakıda "Dərnəgül yolu"nda yerləşən taxta bazarı olub. Uzun illər idi ki, Talıbovlar ailəsi bu bazarda böyük pullar qazanırlar və bu vəsaitlər rəsmiləşdirilmirdi.

Sahibkarların bildirdiyinə görə, artıq bazarda Talıbovların adamları gözə dəymir. Onlar obyektdən tamamilə uzaqlaşdırılıb. İndi taxta bazarına Bakı Şəhər İcra Hakimiyyətinin "Yeraltı Keçidlər üzrə Ticarət Birliyi" nəzarət edir. İcarə haqları bu birlik tərəfindən rəsmi olaraq qəbul edilir və həmçinin hər bir sahibkar Dövlət Vergi Xidmətinin kassa aparatları ilə təmin olunub.

Onu da qeyd edək ki, sözügedən bazar bir neçə dəfə güclü yanğınlarla gündəmə gəlib. Burada əsas problemlərdən biri ondan ibarət idi ki, Talıbovlar bazarda Fövqəladə Hallar Nazirliyinin təhlükəsizliyə qarşı önləyici tədbirlər görməsinə imkan yaratmırdılar. Bu hadisələri də o zaman klanların savaşı kimi şərh edənlər vardı.

Telegramda izləyin