"Azərbaycan xalqı heç zaman müstəqilliyimiz uğrunda canlarını qurban verən oğul və qızlarımızı unutmayacaq" - DEPUTAT

"20 yanvar faciəsi Azərbaycan xalqının tarixinə qəhrəmanlıq və rəşadət səhifəsi kimi yazılıb".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 33 ildir ki, xalqımız 20 yanvar faciəsini dərin hüzn və qürurla anır:

"1990-cı ilin yanvarın 19-dan 20-nə keçən gecə, əvvəlcədən fövqəladə vəziyyət elan edilmədən, sovet ordusu Azərbaycana qarşı hərbi əməlliyatlara başlaması nəticəsində 137 nəfər öldürüldü, 744 nəfər ağır xəsarət aldı, 841 nəfər isə qanunsuz olaraq həbs edildi. Sovet ordusunun bu əməliyyatları nəticəsində 200 mənzil, ev, şəxsi və dövlət əmlakı dağıldı. Həlak olanların arasında qadınlar, uşaqlar və qocalar, həmçinin təcili yardım işçiləri və polislərdə vardı. Fövqəladə vəziyyət elan edildikdən sonra isə yanvarın 20-də və sonrakı günlərdə Bakı şəhərində 21 nəfər öldürülmüşdür. Fövqəladə vəziyyətin elan olunmadığı rayonlarda — yanvarın 25-də Neftçalanda və yanvarın 26-da Lənkəranda daha 8 nəfər qətlə yetirilib.

1990-cı il yanvarın 20-də Azərbaycan xalqı öz müstəqilliyi uğrunda ilk şəhidlərini verdi. Qabaqcadan düşünülüb hazırlanmış bu təcavüzkarlıq planının məqsədi Azərbaycan xalqının demokratiya, milli azadlıq uğrunda mübarizəsini boğmaq və insanlarımızı qorxutmaq idi. Lakin SSRİ rəhbərliyi tərəfindən hazırlanan bu xain plan suya düşdü. Xalqın birliyi top-tüfəngə qalib gəld. Azadlığa gedən yolda həyatlarını qurban verən Vətən övladları misilsiz qəhrəmanlıqları ilə Azərbaycan tarixinə yeni parlaq səhifə yazdılar".

Deputat vurğulayıb ki, xalqımıza qarşı törədilən bu cinayəti pisləyərək bütün dünyaya bəyan edən ulu öndər Heydər Əliyev oldu:

"Bilirsiniz ki, həmin vaxt bunu etmək böyük cəsarət tələb edirdi. Qanlı qırğının səhəri gün ulu öndər Azərbaycanın Moskvadakı Daimi Nümayəndəliyinə gələrək insanlığa qarşı törədilən bu qanlı cinayətlə bağlı bəyanat verdi. İmperiyanın paytaxtında dünyanın onlarla aparıcı KİV nümayəndələrinin qarşısında verilən bu bəyanat beynəlxalq aləmdə böyük əks-səda doğurdu. Dahi şəxsiyyət Heydər Əliyev xalqının ən ağır günündə həyatını təhlükə qarşısında qoyaraq Sovet ordusunun təcavüzünü pislədi. O, keçirdiyi mətbuat konfransında faciəni törədənləri və bu cinayət planını cızan Mixail Qorbaçovu kəskin ittiham edərək qoşunların dərhal Bakıdan çıxarılması tələbini irəli sürdü. Bu addım ulu öndər Heydər Əliyevin vətəninə, xalqına məhəbbətinin və sədaqətin nümunəsi idi. Ulu Öndər Heydər Əliyev xalqın istəyi ilə 1993-cü ilin iyununda hakimiyyətə qayıtdıqdan sonra Şəhidlər xiyabanını ziyarət edərək qısa müddətdə bütün şəhid məzarlarının üstü götürülməsini və burada memorial kompleks ucaldılması tapşırığını verdi. Ulu öndər Heydər Əliyevin sərəncamı ilə 20 Yanvar Ümumxalq hüzn günü elan olundu. Bu gün atasının siyasətini uğurla davam etdirən cənab prezident İlham Əliyev hər zaman 20 yanvar şəhidlərinə, onların ailələrin böyük diqqət və qayğı göstərməkdədir. Məhz ona görə də Ali Baş Komandan Şuşanın işğaldan azad olunma xəbərini məhz Şəhidlər Xiyabanında verdi. 33 ildir ki, Şəhidlər xiyabanı xalqımızın müqəddəs ziyarətgahına çevrilib. İllər keçsə də Azərbaycan xalqı müstəqilliyimiz, ərazi bütövlüyümüz uğrunda canlarını qurban verən qəhrəman oğul və qızlarımızı unutmayacaq, daim onları böyük ehtiramla yadd edəcək".

Aysel Yusifqızı

Telegramda izləyin