"Emin Əmrullayevin deputatlara qarşı allergiyası var"

Millət vəkili Etibar Əliyev Elm və Təhsil Nazirliyi yanında İctimai Şuranın üzvlüyündən istefa verməsi müzakirələrə səbəb olub. Daha sonra məsələ ilə bağlı Təhsil Nazirliyi yanında İctimai Şuranın sədri Günel Səfərova qeyd edib ki, millət vəkilinin İctimai Şura ilə bağlı səsləndirdiyi ittihamlar həqiqəti əks etdirmir. Mövzu ilə əlaqəli Yenisabah.az-a danışan millət vəkili Etibar Əliyev bildirib ki, o vaxtilə İctimai Şurada bir çox təklif irəli sürüb:

"Günel xanımın mənim fikirlərimlə bağlı münasibətini oxudum. Həmin açıqlamanı çox təhlil etmək istəmirəm, ancaq Günel xanım iddia edir ki, guya mən İctimai Şuranın iclaslarında heç bir təklif verməmişəm. Bu, böyük yanlışlıqdır və şura üzvünü təkzib etməkdən ibarətdir. Mən iclaslarda çox mühüm təkliflər vermişəm, lakin heç biri nəzərə alınmayıb.

Məsələn, təklif vermişik ki, məktəb direktorlarının seçimində şura iştirak etsin, regional idarələrə rəhbər təyin edilərkən İctimai Şura ilə də məsləhətləşsinlər, çünki şurada kifayət qədər savadlı insanlar, alimlər var. Biz də bioqrafiyalarla tanış olaq, görək ki, bizim regional idarələri təmsil edənlər kimlərdir. Dəfələrlə təhsildə dəstəbazlığa, qohumbazlığa qarşı çıxmışam. Dərsliklərlə, ali təhsillə bağlı çıxışlarım olub, amma təəssüflər olsun ki, Elm və Təhsil Nazirliyinin İctimai Şuraya qarşı münasibəti o qədər də pozitiv olmayıb. Ola bilər, nazir bizimlə 4 dəfə görüşüb, ancaq nə olsun? Bu görüşlərdə nəyi müzakirə etmişik? Nəyə nail olmuşuq? Əmrullayev qoyulan hansı suallara cavab verib?

Azərbaycan Prezidenti cənab İlham Əliyev əksər çıxışlarında ictimai iştirakçılığın genişləndirilməsi ilə bağlı tapşırıqlar verir. O, problemləri qaldırmağı aidiyyəti qurumların nəzdində olan ictimai şuralara tapşırır. Çox təəssüflər olsun ki, nazirliklərin tərkibində olan ictimai şuralar normal fəaliyyət göstərmirlər, bu da əksər nazirlərin avtoritar idarəçiliyi ilə bağlıdır".

Deputatın sözlərinə görə, o, iclasdan bir gün əvvəl Elm və təhsil naziri Emin Əmrullayevlə şəxsi yazışmasının nazirliyə yaxın sosial şəbəkə hesablarında paylaşılması məsələsinin müzakirəsinin gündəliyə salınmasını təklif edib. Onun bu təklifi isə qəbul edilməyib:

"İndi mənə deyirlər ki, Etibar Əliyev xahiş edib və xahişi yerinə yetirilməyib, ona görə bu statusu yazıb. Əslində mən xahiş etməmişəm, təklif vermişəm və Emin Əmrullayev də bizim "WhatsApp" yazışmalarımızı yayıb, bir neçə trol tərəfindən bu yazışmaların paylaşılmasına şərait yaradıb.

252 saylı məktəbdə çalışan müəllim həm də mənim dairəmdə yaşayır. 65 yaşı tamam olur və nümunəvi müəllimdir, onun 1 il müddətini uzatmaq mümkündürmü deyə soruşmuşam.

Bəzi nazirlər deputatların statusları haqqında məlumatları bilmirlər. Qəbul zamanı vətəndaşlar bizim yanımıza ən çox təhsillə bağlı şikayət üçün gəlirlər. Biz bu şikayətləri sistemləşdiririk, bəzilərini sorğu şəklində göndəririk.

Təklifimi qəbul etməyib, olsun, amma onun ən böyük qəbahəti şəxsi yazışmanı ictimailəşdirməkdir. Mən bu məsələnin müzakirəsini tələb etdim, lakin məsələ şurada müzakirə olunmadı. Nazir bizim şura üzvü kimi hər hansı tədbirdə çıxışımıza şərait yaratmayıb. Hətta gənc müəllimlərin qurultayında mənim adım çıxışda idi, amma adımı siyahıdan çıxartdılar.

Nazirin deputatlara qarşı sanki allergiyası var. Onlar tədbirlərə dəvət olunur, lakin heç birinə söz deməyə şərait yaradılmır. Bəs onda bu dəvətlər nə üçündür?! Biz neqativ halları deyirik, buna baxmayaraq heç bir təsiri olmur. Konkret ad çəkim, Bakı Təhsil İdarəsində Fuad Babayev adlı şəxs "direktor maklerliyi" ilə məşğul olur. Məktəb direktorlarını onun əli ilə təyin edirlər. Bunu 4-5 dəfə səsləndirmişəm, nazir heç bu məsələni araşdırmayıb, bir dəfə məndən soruşmayıb ki, bu nə məsələdir? Bu cür qeyri-səmimi mühitdə işləmək çətindir, ona görə də istefamı haqlı hesab edirəm və bütün şura üzvlərinə də hörmətim qalır, amma deməsinlər ki, Etibar Əliyev heç nə danışmırdı. Çıxarsınlar stenoqramları göstərsinlər, görək kimlər nə qədər çıxış edib, hansı təklifi verib, hansı tədbirlərdə çıxış edib.

Mən bir neçə məktəbdə şura adından gənc müəllimlərlə görüşmüşəm, onlara kitablar hədiyyə etmişəm. Sonradan bu fəaliyyət görünür, kimlərisə qane etmədi ki, bəlkə özünü təbliğ edir. Bundan sonra onu da dayandırdılar. Bəs bunlar fəaliyyət deyil?!"

"Biz təhsili və elmi deqradasiyadan xilas etməliyik. Hər bir ziyalı bunun üçün çalışmalıdır. Bilirsiniz, regionlardan bizə nə qədər şikayət gəlir? Menecer adı ilə təyin olunmuş regional idarələrin müdirləri insanları qəbul etmirlər, nümunəvi məktəb direktorlarını, müəllimləri sıxışdırıb işdən çıxarırlar. Mən dəfələrlə bunu İctimai Şuranın iclaslarında demişəm.

Mənin seçildiyim rayondakı - Suraxanı, Qaraçuxurdakı məktəb direktorlarına diqqət edirəm, dəhşətə gəlirəm, onların əksəriyyətində heç direktor obrazı yoxdur. Onlar məktəbi necə idarə edəcəklər? Bu gün məktəb adlı böyük bir dəyər artıq sıradan çıxır. Yuxarı siniflərdə dərsə davamiyyət çox aşağı səviyyədədir. Uşaqları məktəbə cəlb etməksənsə, onların məktəbdən yayındırma siyasətini Elm və Təhsil Nazirliyi dəstəkləyir. Cənab Prezidentin təhsilə olan yüksək münasibətini hamımız görürük, biz bu etimadı doğrultmalıyıq. Biz hanısa fərdin müdafiəsi ilə məşğul olmamalıyıq, dəyəri qorumalıyıq"

Telegramda izləyin