"Xankəndidə keçirilən ilk futbol matçı və cənab pezidentimizin topa ilk toxunuşu xalqımızın yaddaşında əbədi qalacaq" - DEPUTAT

"Prezident Xankəndi stadionundakı çıxışı və topa toxunuşu ilə bizi də, idman tariximizi də qürurlandırdı".

Bunu Sonxeber.az-a açıqlamasında millət vəkili Tamam Cəfərova bildirib. Millət vəkili qeyd edib ki, Prezidentin "Qarabağ" və MOİK arasındakı qarşılaşmanı Xankəndidə bilavasitə izləməsi idman tariximizin üçün tamamilə yeni və təkrarsız bir mərhələdir:

"Hər şeydən öncə qeyd edim ki, "Qarabağ"-MOİK futbol oyununun Xankəndi stadionunda keçirilməsi faktının özü olduqca qürurverici və əzəmətlidir. Bu fakt vətəndaşlarımız kimi, idmanımızın da doğma torpaqlarımıza, gözəl Qarabağa qayıtdığını göstərir. Bu fakt sübut edir ki, Qarabağ zonası yaxın illərdə sadəcə mühüm sənaye və kənd təsərrüfatı, elm və təhsil mərkəzi olmaqla yanaşı, həm də idman mərkəzi kimi də tanınacaq, öz idman uğurları ilə bütün dünyanın diqqət mərkəzində olacaq.

Prezidentin topa ilk toxunuşunun da rəmzi mənası mövcuddur. Topa ilk olaraq dövlət başçısının toxunması ondan xəbər verir ki, ölkəmizin hər bir bölgəsində olduğu kimi Qarabağımızda da idmanın inkişafının, tərəqqisinin qarantı Prezident İlham Əliyev olacaq".

Millət vəkili Prezidentin futbol matçını şəhid övladlarının əhatəsində izləməsinə də diqqət çəkdi:

"Prezident İlham Əliyevin Xankəndindəki tarixi futbol matçını şəhid övladları ilə birlikdə izləməsi ölkə başçısının şəhid ailələrinə olan sevgi və qayğısından xəbər verir. Bu reallıq bir kəs daha onu söyləməyə əsas verir ki, Prezident İlham Əliyev üçün şəhid ailələri hər zaman hər yerdə öncəlik təşkil edir və dövlət başçısı bununla bütün ictimaiyyətə olduqca mühüm bir mesaj ünvanlayır. Bu mesajn mənası isə odur ki, hər bir vətəndaş şəhid ailələrinə, müharibə veteranlarına diqqət və qayğı ilə yanaşmalı, hər zaman onlara xüsusi diqqət və qayğı gösətrməlidir. Çünki 30 il ərzində erməni işğalı altında qalan torpaqlarımız məhz onların qanı, canı bahasına azad edilib, tarixi ədalət məhz onların fədakarlığı sayəsində bərpa olunub".

Millət vəkili Xankəndidə keçirilən oyunun siyasi baxımdan da böyük məna kəsb etdiyini vurğulayıb:

"Xankəndində Prezident İlham Əliyevin xeyir-duası ilə ilk futbol matçının keçirilməsinin və dövlət başçısının topa toxunuşunun siyasi əhəmiyyəti də çox böyükdür. Bu oyun və Prezidentimizin stadionundakı çıxışı vaxtiylə bu torpaqlarda "Qarabağ Ermənistandır və nöqtə" deyənlərin necə böyük yanlışın içində olduğunu bir kəs daha sübut etdi. Xankəndidə keçirilən futbol matçı növbəti dəfə sübut etdi ki, bu torpaqların əsl sahibi Azərbaycan xalqıdır və bu xalq ermənilərin 30 il ərzində minalarla, sursatlarla çirkləndirdiyi bu torpaqlara yenidən həyat gətirməkdə, həmin torpaqları yerli və beynəlxalq idman ictimaiyyəti üçün sevinc mənbəyinə döndərməkdədir.

Əminəm ki, illər, əsrlər keçsə də Xankəndidə keçirilən ilk futbol matçı, o cümlədən Prezidentimizin topa ilk toxunuşu xalqımızın yaddaşında əbədi qalacaq, xalqımız Vətən müharibəsindəki tarixi qələbləri ilə yanaşı, bu futbol matçı ilə iftixar duyacaq".Millət vəkili Tamam Cəfərova belə deyib.

Telegramda izləyin