Ermənilər deputatlığa namizədliyini irəli sürə bilər? - AÇIQLAMA

2024-cü il fevralın 7-də Azərbaycanda növbədənkənar prezident seçkiləri keçiriləcək. Bununla bağlı, Prezident İlham Əliyev sərəncam imzalayıb. Bu seçki həm də tarixi bir seçki olacaq. Belə ki, müstəqil Azərbaycanın tarixində ilk dəfə olaraq seçkilər bütün ölkə ərazisində keçiriləcək. Azərbaycan vətəndaşlığını qəbul edən ermənilər o cümlədən səs verə biləcək. Burada maraqlı bir sual yaranır. Xankəndidə yaşayan ermənilər deputatlığa namizədliyini irəli sürə bilər?

Milli Məclisin deputatı Nəsib Məhəməliyev Sonxeber.az-a açıqlama verib. Onun sözlərinə görə, hal-hazırda Qarabağda erməni millətindən deputat seçilməsi üçün kifayət qədər elektorat yoxdur:

"Əgər, gələcəkdə say tərkibi yaranarsa, konstitusiyamız, millətindən asılı olmayaraq, hər bir Azərbaycan vətəndaşının seçilmək hüququnu tanıyır".

Siyasi şərhçi Asif Nərimanlının sözlərinə görə, Azərbaycanda dinindən yaxud kimliyindən asılı olmayaraq hər kəsin seçmək və seçilmək hüququ var:

" Qanunvericilikdə bu tam öz əksini tapıb. Praktiki müstəvidə belə, Azərbaycan müstəqilliyini bərpa etdikdən sonra, hətta 1918-ci illərdə belə bu hüquq təmin edilib. Bu gün Azərbaycanda rus əsilli, yəhudi və ləzgi əsilli, digər azsaylı xalqların nümayəndələri olan Azərbaycan vətəndaşları həm səs verir, həm də öz namizədliyini irəli sürürlər. Bu baxımdan heç bir problem olmayıb. Azərbaycan qanunvericiliyi orqanında azsaylı xalqların nümayəndələri təmsil olunurlar. Azərbaycan çox konfessional və çox milləti ölkədir. Bu baxımdan Azərbaycan dünyada bəlkə ən nadir ölkələrdəndir. Bütün xalqların nümayəndələrinin hüquqları tam təmin edilir".

Asif Nərimanlı bildirib ki, Azərbaycanda etnik qruplar milli və dini kimliyinə görə, seçilmir:

" Praktiki müstəviyə nəzər saldıqda, Azərbaycan vətəndaşlığını qəbul edən və Xankəndidə yaşayan ermənilərin seçmək və seçilmək hüququ var. Təbii ki, onlar qanunverici orqanda təmsil olunmaq və namizədliyini irəli sürmək istəyərsə bunda heç bir problemin olmadığını düşünürəm. Həm qanun bu hüququ tanıyır, həm də indiyə qədərki Azərbaycanın seçki təcrübəsi göstərir ki, digər vətəndaşlar kimi Azərbaycanda erməni əsilli vətəndaşlar və Xankəndidə yaşayan ermənilər bu hüquqdan faydalana biləcək".

Sevda Səfərova

Telegramda izləyin