Qarabağda yaşayan erməni sakinlərinin pensiya məsələləri necə tənzimlənəcək? - AÇIQLAMA

Qarabağ iqtisadi rayonunda konstitusion hüquqlarımız bərpa edildikdən sonra regionda idarəetmə və quruculuq işləri davam edir. Qarabağda yaradılan "rejim" erməni sakinlərinin mənafeyini nəinki qorumayıb, eyni zamanda istismar edib. Separatçı rejim "qaydalar" qoymaqla erməni sakinlərini oyuncağa çevirib. Azərbaycan vətəndaşlığını qəbul edən ermənilər ilə bağlı daha bir maraqlı məqam yaranır. Məlum olduğu kimi erməni sakinlərin pensiya məsələləri "rejim"in qoyduğu "qaydalar" əsasında həyata keçirilirdi və onların pensiya yaş həddini, kim və haraya nə ödədiyini bilmirik. Azərbaycanda isə pensiyaya çıxma yaşı aydındır ki, kişilərdə 65 qadınlarda isə 63-dür. Bu baxımdan işğaldan azad olunmuş ərazilərdə yaşayan erməni sakinlərinin pensiya məsələləri necə həll olunacaq?

Mövzu ilə bağlı bank məsələləri üzrə ekspert, hüquqşünas Əkrəm Həsənov Sonxeber.az-a açıqlama verib. O bildirib ki, bu çox mürəkkəb məsələdir. Yalnız mürəkkəb deyil. Xankəndi və Qarabağda yaşamış ermənilərə aid digər məsələlər var:

"Onlara aid daşınmaz əmlak, torpaq, ev, mənzil və bank əmanətləri sığortalı deyil. Onların avtomobilləri belə rəsmi qeydiyyatda deyil. Eynilə pensiya məsələləri. Pensiya yaşları aydındır. Onları tənzimləmək olar. Azərbaycan ərazisində başqa pensiya yaşı yoxdur. Vahiddir və ermənilər daxil olmaqla hamıya aiddir. Amma burada pensiya kapitalından söhbət gedir. Onlar bizim Dövlət Sosial Müdafiə Fonduna sosial sığorta haqqı ödəməyiblər. Pensiya isə pensiya kapitalına bağlıdır. Orada harada nə ödəyiblər bilinmir. Bu məsələlərin həlli üçün yəqinki biz qanunlara dəyişiklik etməli ola bilərik. Bildiyim qədərilə orada ermənilər çox deyil. Bu məsələ necəsə tənzimlənməlidir".

Ekspertin sözlərinə görə, daşınmaz əmlaka dair onlardan sənəd istəməliyik. Bu zaman müəyyən etməliyik ki, biz nəyi tanıyırıq:

"Mən şəxsən tərəfdarıyam ki, SSRİ dağılmayana qədər orada kiminsə əmlakı olubsa onu tanıyaq. Sonrakı dövrdə əgər kimsə nəsə tikibsə bu tanıyıb tanımamağımız üçün qanun lazımdır. Pensiya məsələsi də buraya daxildir. İndi biz xoşməramımızı göstərib deyə bilərik ki, onların oradakı sənədləşdirilməsinə baxıb pensiya kapitalını tanıya bilərik. Amma onda gərək dövlət büdcəsindən Dövlət Sosial Sığorta Fonduna əlavə vəsait verilsin. Çünki o vəsaiti vaxtilə verməyiblər. Sırf bu istiqamət üzrə, qısacası hər məsələ üzrə qanun olmalıdır. Qanun tənzimlənməlidir ki, onlara dair müəyyən istisnalar ola bilər yoxsa yox".

Əkrəm Həsənovun sözlərinə görə, bu məsələlər daha çox siyasi müstəvidə olmalı olacaq:

"Təbii olaraq, bizi heç kim heç nəyə məcbur edə bilməz ki, biz o qanunları qəbul edək. Amma indi bilirik ki, dünya ictimaiyyətində bizə qarşı mənfi fikir yaratmaq istəyirlər. Guya biz onları qovmuşuq, haqlarını pozmuşuq. Bu baxımdan ola bilər ki, hansısa onlara tərəf müəyyən addımlar ataq. Hansısa bir müəyyən dövrədək kimsə deyək ora qayıtdı. Biz durub dünyanın axırına kimi gözləyə bilmərik ki, ermənilər ora qayıdacaq ya yox. Kim əgər qayıtmaq istəyirsə qayıtsın. Biz yəni bilməliyik ki, hansı əhalidən söhbət gedir. Bu məsələlər hələ həll olunmayacaq".

Sevda Səfərova

Telegramda izləyin