Rusiya sülhməramlıları vaxtından əvvəl regionu tərk edə bilər? - AÇIQLAMA

Bu gün hər kəsi maraqlandıran suallardan biri də Rusiya sülhməramlılarının Qarabağı nə zaman tərk etməsidir. Rusiya tərəfinin verdiyi açıqlamalardan bəlli olur ki, regionda qalmaq istəyir. Rusiyanın sülhməramlıların fəaliyyətsizliyi Azərbaycanın Qarabağ bölgəsində bir neçə dəfə antirerror əməliyyatı keçirməyə məcbur etdi. Sonuncu 24 saatlıq antiterror əməliyyatı nəticəsində Azərbaycan bütün ərazilərdə öz suverenliyini bərpa etmiş oldu. Bununla da, Rusiya sülhməramlılarının orada qalmasına ehtiyac yoxdur. Azərbaycan tərəfi vaxtından əvvəl Rusiya sülhməramlılarının Qarabağdan çıxarılması ilə bağlı qərar verə bilərmi?

Bununla bağlı Sonxeber.az-a açıqlama verən hərbi ekspert Səxavət Məmməd bildirib ki, Rusiya sülhməramlıların bölgəyə gəlişinin səbəbi 10 noyabr bəyanatı idi:

"2020-ci ilin 10 noyabrda imzalanan üçtərəfli bəyanata əsasən, Rusiya sülhməramlıları 2025-ci ilin noyabrına qədər regionda qalacaqlar. Rusiya tərəfinin verdiyi açıqlamalardan bəlli olur ki, onlar regionda qalmaq istəyir. Azərbaycan tərəfi 2025- ci ilin may ayında Qarabağda qalıb-qalmaması ilə bağlı qərar verəcək. Məsələ ondadır ki, Rusiya sülhməramlıların Qarabağda demək olar ki, heç bir fəaliyyəti yoxdur".

O, bildirib ki, bu gün Qarabağda Rusiya sülhməramlıların sayları həddindən artıq çox azdır və hazırda heç bir fəaliyyətləri yoxdur:

"Sadəcə Rusiyanın varlığı kimi qalıblar. Onlar bundan sonra çalışacaqlar ki, yenə də Rusiyanın varlığı kimi qalsınlar. Burada bir neçə başqa məsələlər var idi. Ermənistan tərəfi istəyirdi ki, əraziya Avropa İttifaqının yaxud Fransanın hər hansı missiya adı altında sülhməramlıları yaxud hərbçiləri daxil olsun. Buna təbii ki, nə Azərbaycan, nə də Rusiya razı idi. Azərbaycan bilir ki, əgər əraziyə Avropa İttifaqının yaxud Fransanın sülhməramlıları daxil olarsa, tələbləri və şərtləri durmadan artacaq".

Ekspertin sözlərinə görə, rus sülhməramlıların vaxtından əvvəl çıxması inandırıcı deyil:

"Rusiya regionda qalmaq istəyəcək. Hazırda qərb ölkələri region uğrunda həm kollektiv, həm də tək-tək mübarizə aparır. Bu baxımdan hesab edirəm ki, Rusiya ərazidən çıxmağa razı olmayacaq. Rəsmi Bakıda Rusiyanın bu istəyini anlayışla qarşılayacaq. Qarabağda Rusiya sülhməramlıları heç bir əngəl törətmir. Nəzərə almalıyıq ki, hazırda Qarabağda az da olsa ermənilər yaşayır. Biz bilmirik ki, bundan sonra kpçüb gedən ermənilər qayıdacaq yoxsa yox. Ortalıqda belə məsələlərdə var".

Səxavət Məmməd düşünür ki, Rusiya sülhməramlıların vaxtının uzadılması ehtimalı baş tutmayacaq:

" Bu gün Azərbaycan 10 noyabr bəyanatının bütün şərtlərini yerinə yetirir. Biz rəsmi olaraq öz ərazi bütövlüyümüzü və suverenliyimizi bərpa etmişik. Ona görə də düşünürəm ki, Rusiya sülhməramlılarının Qarabağda qalmasının vaxtı uzadılmayacaq. Hesab edirəm ki, 2025-ci ilin noyabr ayına qədər Rusiya sülhməramlıları regionda qalacaq".

Sevda Səfərova

Telegramda izləyin