Ərzaq məhsullarının bahalaşmasının səbəbi nə ilə bağlıdır? - AÇIQLAMA

Ölkədə ərzaq məhsullarının bahalaşması davam edir. Ərzaq məhsullarına tələbatın artması ilə əlaqədar bu gün aldığımızın məhsulun sabah bir qədər də bahalaşdığının şahidi oluruq. Xüsusilə, Bakı və ətraf rayonlarda quzu ətinin bir kilosu 20 manata təklif olunur. Bəs bu bahalaşmanın səbəbi nə ilə bağlıdır?

Mövzu ilə bağlı, iqtisadçı ekspert Natiq Cəfərli Sonxeber.az-a açıqlama verib. Natiq Cəfərli bildirib ki, ərzaq məhsullarında bahalaşma təqribən noyabr-dekabr aylarından mart ayına qədər davam edib:

"Bahalaşma Yeni il və Novruz bayramlarına görə ərzağa olan tələbin artması ilə əlaqəlidir. İndi bu məsələyə spesifik məsələlər əlavə olunub. Çünki bu illər ərzində ərzaq ilə özümüzü təmin etməyimizdə ciddi irəliləyiş əldə olunmadı. Biz təqribən 70-75 faiz aralığında xaricdən asılıyıq. Son illər xaricdə qiymət artımının sürətlənməsi Azərbaycana idxal olunan məhsulların qiymətinin daha kəskin artması ilə müşahidə olundu. İndi də biz eyni prosesləri görürük. Həm bayramlar ilə əlaqədar tələbat artır, həm də yerli məhsulların mövsüm ilə əlaqəli çəkilməsi ilə paralel olaraq kəskin artımının şahidi oluruq. Əfsuslar olsun ki, bu vəziyyət aprel ayına qədər davam edəcək. Aprel ayından sonra müəyyən səngimələr ola bilər. Payızın ilk aylarına qədər müəyyən dərəcədə qiymət artımında sürət azalacaq. Son illərin təcrübəsinə əsaslansaq, noyabr ayından daha kəskin qiymət artımını müşahidə edəcəyik. Təəssüf ki, ölkəmiz uzun illərdir bu paradiqmadan çıxa bilmir".

Qeyd edək ki, mal və quzu ətinin qiymətinin qalxdığını satıcılar da təsdiqləyib.

Sevda Səfərova

Telegramda izləyin