Məşhurların sosial şəbəkə hesabları niyə HƏDƏFDƏDİR? - EKSPERT AÇIQLADI

Xəbər verdiyimiz kimi ötən gün Xalq artisti Aygün Kazımovanın 1,4 milyon izləyicisi olan rəsmi instaqram hesabı oğurlanıb. Müğənninin profil fotosu və səhifənin məlumat bölməsi dəyişdirilib, bütün paylaşımları silinib. Məşhurların səhifələrinin oğurlanmasının səbəbi nədir? Həmin səhifələri yenidən bərpa etmək mümkündür?

Bu barədə İKT üzrə ekspert Elvin Abbasov Sonxeber.az-a açıqalmasında bildirib ki, son günlərdə sosial şəbəkə hesablarının kütləvi şəkildə oğurlanması fərqli məqsədlər daşıyır:

" Bunlardan bəziləri şəxsi qərəzlilik müstəvisində olur. Bir çox halda isə kütləvi izləyicisi olan səhifələri oğurlayıb onları xarici kriptovalyuta və ya saxta valyuta satmaq, dələduzluq məqsədləri ilə istifadə olunur. Hansı ki, çox böyük kütləsi olan səhifələr daha sonra baxırıq ki, reklamlar, mal satışları yaxud kriptovalyuta satışları həmin böyük səhifələr üzərindən həyata keçirilir. Bunların qarşısını almaq üçün ikili identifikasiya aktivləşdirilməlidir. Bu səhifələrin 100 faiz oğurlanmasının qarşısını almasa da böyük həcmdə qarşısını alır. Yəni ki, hər səhifəyə girişdə, əgər bu səhifə "keş" bölməsində qalmayıbsa telefonlara kod gəlir. Həmin kodlar vasitəsilə giriş edilir və bir neçə təsdiqdən sonra səhifəyə daxil olur. Oğurlanan səhifələrin isə bərpası, geri qaytarılması mümkündür. Oğurlanan böyük səhifələr əgər "mavi tık" almayibsa da Rəqəmsal İnkişaf və Nəqliyyat Nazirliyi tabeliyində olan Elektron Təhlükəsizlik Xidmətinə müraciət edərək oğurlanan səhifələrin bərpası üçün müraciət etmək mümkündür. Daha əvvəl analoji təcrübələrdə bir çox halda ETX-nin oğurlanmış səhifələrin geri qaytarılmasında vətəndaşlara çox böyük köməyi olub".

Qeyd edək ki, bundan əvvəl idmançı Pərviz Abdullayev ("Kobra" Pərviz), müğənni İradə İbrahimova və digər məşhurlarla bağlı eyni hallar yaşanıb. Hak edilən səhifələrdəki məlumatlar silinib, məzmuna uyğun olmayan paylaşımlar edilib.

Sevda Səfərova

Telegramda izləyin