Zorakılıq edən 11-ci sinif şagirdi məktəbdən xaric edilə bilər? - AÇIQLAMA

Xəbər verdiyimiz kimi, sosial şəbəkələrdə 156 nömrəli məktəbin XI sinif şagirdinin (müvafiq səbəbdən şagirdin adı qeyd olunmur) yanvarın 17-si məktəbdən kənarda 2023-cü ildə IX sinifdən məzun olmuş qıza qarşı uyğunsuz və qeyri-etik davranışına dair görüntülər yayılıb. Bəs sözügedən şagird məktəbdən xaric oluna bilər?

Məsələ ilə bağlı təhsil məsələləri üzrə ekspert Elmin Nuri Sonxeber.az-a bildirib ki, bu məsələnin məktəblə və müəllim ilə heç bir əlaqəsi yoxdur. Əfsuslar olsun ki, biz bir neqativ hal görürüksə, məktəblə əlaqələndirməyə çalışırıq. Bu hal məktəbdən kənar bir ərazidə, bir neçə qız şəxs tərəfindən törədilibsə məktəb burada bir məsuliyyət daşımır:
"Təbii ki məktəbin burada funksiyası var. Bunlardan biri tərbiyədir. Amma bu əsas funksiya deyil. Məktəb şagirdi formalaşdırmalı və tədris-təlim verməlidir. Daha sonra isə tərbiyə verməlidir. Burada əsas rol ailə institutunun payına düşür. Burada əsas məqama diqqət edin. Zərərçəkmiş qız qorxur. Mən ona da qıcıq oluram. İnsan həyatda təklənə yaxud hər cür vəhşi insan ilə üzləşə bilər. Amma bu qızın canında bir qorxu var. Psixoloqlar bunu daha yaxşı bilərlər. Çünki bu insan ailə də laqeydlik görüb. Ailədə biraz özünə qarşı soyuqluq görüb və onu özünə qapadaraq zəiflədib. O qızın güvən yeri yoxdur. Mən o videodan gördüklərimi deyirəm. Ancaq digərlərinə baxaq. Necə vəhşi, necə də özlərindən əmin, razı görünürlər. Burada ailə deməli o uşaqları qudurğan böyüdüb. Burada ailənin bu uşaqlar üzərində ya tərbiyəsi yoxdur, ya da ailənin ailəyə onlara verəcəyi dəyərlər bu imiş".

Elmin Nuri deyib ki, burada sosial şəbəkələrin- "TikTok", "Facebook", "Instagram"ın "rolu" görünür.

"Mən burada xüsusi olaraq "TikTok"u demək istəyərdim. "TikTok" həqiqətən bizim cəmiyyətdə mənəvi deqradasiyaya səbəb olan əsas qüvvələrdən biridir. Əsasən bu düşüncədə olan şəxslər, küçə düşüncəsində olanlar "TikTok"da özünü fenomen hesab edir. Əsasən kütləyə xitabda xüsusi qabardılır. Onların təsirinə düşən bu cür yuyulmuş və boş beyinlər özləri üçün bir dünya qururlar. Siz o qızların hərəkətlərinə baxın. Onların artıq özlərinə məxsus vəhşi və tərbiyəsiz dünyaları var. Bu dünya elə belədən qurulmur. Mən ona görə məktəbin adına pis oluram ki, artıq məktəb daha da nüfuzdan düşür. Məktəb ilə bağlı problem ayrı bir məsələdir. Məktəb burada məkan olaraq heç vurğulanmır. Mən rəyləri oxudum. Guya bu qızlar ağıllıdı və sinifdə bunu etməyiblər. İnandırım sizi bunu məktəbdə etsələr belə bir-başa məktəbin günahı sayılmır. Amma məktəb buna laqeyd qalacaqsa, tədbir görməyəcəksə başqa məsələdir. Əgər bu hadisə məktəbin içində baş verərsə bu ola bilər. İndi burada məktəbin edəcəyi bir şey yoxdur.

Ekspertin sözlərinə görə, rəsmi dövlətlər qurumlar bu işin üzərinə düşdülər. Pis yaxud yaxşı olaraq sosial şəbəkələrin burada faydasını gördük:

"Məlumat sürətlə yayıldı. DİN-in rəsmi şəxsi özünün "Facebook" hesabında məlumat verdi ki, hadisə nəzarət altındadır. Bu biraz vəziyyəti düzəltmiş oldu. Söhbət burada mənəvi tərəfdən gedir. Məndə olan məlumata görə, orada şiddət göstərən qızların biri heç həmin məktəbin şagirdi də deyil. Qıraq bir adamdır. Biz burada hər şeyi məktəbdən gözləməyək. Həmin məktəb, o cümlədən digər məktəblər maarifləndirmə və tərbiyələndirmə işlərini daha yaxından həyata keçirə bilərlər. Məktəblər valideynlər ilə işi sürətləndirə bilər, məktəb psixoloqlarını işə daha lazımlı şəkildə gətirə bilərlər. Sinif rəhbərlərinin iş mexanizmini artırıla bilər. Şərt deyil ki, hadisə məktəbdə baş versin. Bu hadisə məktəb yaşında bir şagirdin başına gəlirsə, digərləri buna "SOS" siqnalı kimi baxmalıdır. Amma hər bir halda şagirddir. Biz əvvəlcə hadisənin rəsmi dövlət nəzarət altında olduğunu unutmamalıyıq. Görək, hüquqi baxımdan hansı addımlar atılacaq. Əsas olan budur. Pedaqoji baxımdan şagirdin məktəbdən xaric olunması isə pedaqoji şuranın qərarından asılıdır. Şəxsən mən, subyektiv qərarım olsa, o şagirdi bir gün də məktəbdə saxlamaram.

Sevda Səfərova

Telegramda izləyin