"Bir neçə gündən sonra cənab prezident İlham Əliyev yüzlərlə ailəyə böyük sevinc bəxş edəcək" - DEPUTAT

Xəbər verdiyimiz kimi 28 May - Müstəqillik Günü ərəfəsində Prezident İlham Əliyev tərəfindən növbəti əfv sərəncamının imzalanacağı gözlənilir.

Bununla bağlı Sonxber.az-a danışan deputat İqbal Məmmədov bidirib ki, əfv sərəncamı cənab prezident İlham Əliyevin vətəndaşına göstərdiyi diqqət və qayğısının daha bir nümunəsidir:

"Hər il olduğu kimi bu il də bayram bayrama qarışacaq. Demək olar ki, hər il cənab prezident İlham Əliyevin Azərbaycan 28 May - Müstəqillik Gününü münasibəti ilə yüzlərlə vətəndaşımız doğmalarına qovuşur. İmzalanan hər əfv sərəncamı cənab prezident İlham Əliyevin mükəmməl siyasətindən doğan humanistlikdir. Bu gün Azərbaycanda dövlət siyasətinin əsas məqsədlərindən biri insan hüquq və azadlıqlarının hərtərəfli təmin edilməsidir. Ölkəmizdə Bu sahədə mütəmadi olaraq islahatlar həyata keçirilir və əhəmiyyətli işlər görülür. Cinayət törədənlərin əfv olunması humanizm və cəmiyyətdaxili balansın qorunması baxımından böyük önəm daşıyır. Müstəqillik dövründə Azərbaycanda 69 əfv sərəncamı və 12 amnistiya aktı imzalanıb. Cənab prezidentin İlham Əliyevin bu humanist addımları nəticəsində minlərlə şəxs azadlığa qovuşub".

Deputat qeyd edib ki, bir neçə gündən sonra müstəqilik dövrün 70-ci əfv sərəncamı imzalanacaq:

"Bilirsiniz ki, ötən il ulu öndər Heydər Əliyevin 100 illik yubileyi münasibətilə müstəqil Azərbaycan tarixində ən böyük əfv sərəncamı imzalandı. Cənab prezident İlham Əliyevin imzaladığı həmin sərəncamla 801 məhkum əfv olunmuş, onlardan 463 şəxs azadlıqdan məhrum etmə cəzasından, 220 şəxs azadlıqdan məhrum etmə cəzasının çəkilməmiş hissəsinin yarısından, 118 nəfər azadlıqdan məhrum etmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad edilib. Bir neçə gündən sonra cənab prezident İlham Əliyev 28 May - Müstəqillik Günü ərəfəsində imzalayacağı əfv sərəncamı yüzlərlə ailəyə böyük sevinc bəxş edəcək".

Telegramda izləyin