Ermənistanın qazanc mənbəyi: COP-29-a qədər mina xəritələri VERİLƏCƏK?

Xəbər verdiyimiz kimi, işğaldan azad edilmiş Cəbrayıl rayonunun Horovlu kəndi ərazisində mina hadisəsi baş verib. Məlumata görə, kənd təsərrüfatı sahəsində çalışan 1991-ci il təvəllüdlü Goranboy rayon sakini Nuruyev Raqib Səxavət oğlunun idarə etdiyi "Man" yük avtomobili minalardan təmizlənməmiş ərazidə tank əleyhinə minaya düşüb. Hadisə nəticəsində sürücü müxtəlif dərəcəli xəsarət alıb.

Sözügedən ərazidə bu gün sursat partlayışı hadisəsi də baş verib. Ərazidə icra edilən minatəmizləmə prosesi zamanı baş verən partlayış nəticəsində Agentliyin əməkdaşı 1980-ci il təvəllüdlü İsayev Raqif Deputat oğlu həyatını itirib.

Təəssüflər olsun ki, öz terrorçuluq əməllərini davam etdirən Ermənistan hələ də mina xəritələrini Azərbaycana verməkdə niyyətli deyil. Erməönistan hökuməti mina xəritələri verdiyini iddia edir. Lakin verilən xəritələrin çoxu qeyri-dəqiqdir. Bu gün işğaldan azad edilmiş ərailərdə basdırılan minaların ucbatından mülki əhali əziyyət çəkir. Eyni zamanda, danışıqlar prosesləri davam edir. COP-29-a qədər Ermənistan Azərbaycana mina xəritələrini verə bilər?

Mövzunu Sonxeber.az-a şərh edən siyasi şərhçi Asif Nərimanlı deyib ki, Ermənistanın COP-29 tədbirinə qədər mina xəritələrini vermə ehtimalı azdır. Çünki onlar iddia edirlər ki, mina xəritələrinin hamısı verilib:

"Halbuki bu iddia doğru deyil. Ən azından işğal dövründə mina xəritələri həm Ermənistan Müdafiə Nazirliyində, həm də separatçıların əlində var idi. Ermənistan Müdafiə Nazirliyi mina xəritələrini versə belə, həmin xəritələrin hamısı separatçıların əlində var. Qarabağda separatizmə son verildi. Yerdə qalan separatçılar isə Qarabağdan qaçdılar. Hazırda onlar Ermənistandadır. Ermənistan hökuməti həmin xəritələri separatçılardan alaraq Azərbaycana təhvil verməlidir. Bu məsələ Ermənistanın marağında deyil. Əgər belə olsaydı, indiyədək dəqiq olan mina xəritələrinin hamısını vərərdilər. Mina xəritələri Ermənistan üçün siyasi qazanc mənbəyi rolunu oynayıb. Çünki Bakıda həbs olan ermənilərin qaytarılması məsələsindən istifadə edə bilərlər. Qeyd edək ki, bu beynəlxalq humanizm prinsiplərinə ziddir. Mənim fikrimcə, onların əlində mina xəritələri hələ də qalıb və bunu gizlətməkdə davam edirlər".

Asif Nərimanlının sözlərinə görə, Ermənistan sülh danışıqlarında bu məsələni yenidən gündəmə gətirə bilər. Amma rəsmi Bakının qəbul etmədiyi bir məsələ var:

"Ermənistanın verdiyi xəritələrin 25 faizi doğru olub. Verilənlərin çoxu qeyri-dəqiqdir. Burada Azərbaycanın əldə etdiyi nəticə böyük olmur. Mina problemi rəsmi Bakının beynəlxalq müstəvidə gətirəcəyi bir məsələyə çevrilib. Artıq beynəlxalq təşkilatları bu məsələyə cəlb etməyə çalışırlar. Görünür ki, ermənilərin verəcəyi mina xəritələrinə inam yoxdur. Digər tərəfdən, Ermənistanın bu xəritələri verməsi sual altındadır. Çünki növbəti mərhələdə yeni bir xəritənin verilməsi özlərini təkzib etməsi deməkdir. Ermənistanda hakimiyyətdə kimin olduğu fərqi yoxdur. Onların çoxunda bir xislət var. Ermənilər Azərbaycanın mina baxımından əziyyət çəkməsində maraqlıdır. Minaların təmizlənməsi ləngisə, ərazilərin bərpası prosesi gecikir. Mina terrorunun qurbanı olan mülki şəxslərin sayı isə artmaqda davam edir. Ermənilər maksimum dərəcədə ziyan verməkdə maraqlıdır. COP 29-a qədər minaların verilməsi, veriləcək xəritələrin isə tam dəqiq olması sual altındadır".

Sevda Səfərova

Telegramda izləyin