Toyda başlayan dava qanla bitdi

Serikdə toyda Serik Bələdiyyəsinin keçmiş sədr müavini Ziya Yıldırım eyni dövrdə MHP-dən məclis üzvü olan Həsən Əli Tunceri güllələyib.

Sonxeber.az türk mediasına istinadən xəbər verir ki, hadisə ötən gecə Serikin Belkıs rayonunda keçirilən toyda baş verib. 2019-2024-cü illərdə Serik Bələdiyyəsinin sədr müavini vəzifəsini icra edən Ziya Yıldırımla eyni tarixdə MHP-dən məclis üzvü olan Həsən Əli Tuncer arasında başlayan mübahisə qısa zamanda qızışıb. Mübahisə şiddətlənərkən Yıldırım yanında gəzdirdiyi silahı çıxarıb və Tuncerə 3 dəfə atəş açıb. Güllələrdən ikisi Tuncerin bədəninə dəyib.

Hadisə zamanı toyda olan həkim Tuncerə ilkin tibbi yardım göstərib. Daha sonra təcili tibbi yardımla Serik Dövlət Xəstəxanasına aparılan Tuncer bütün səylərə baxmayaraq xilas ola bilməyib. Tuncerin meyti ekspertizaya göndərilib.

Hadisədən sonra qaçan Ziya Yıldırım qısa müddətdə polis tərəfindən tutularaq saxlanılıb. Polis hadisə ilə bağlı ətraflı araşdırmalarını davam etdirir.

Telegramda izləyin