"Putinin səfəri ölkələrimiz arasında dostluq və müttəfiqlik münasibətlərinin inkişafına mühüm töhfə verəcək" - DEPUTAT

"Rusiya Prezidenti Vladimir Putinin ölkəmizə dövlət səfəri iki ölkə arasındakı münasibətlərin yeni mərhələsi hesab oluna bilər".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, iki dövlət başçısının Bakıdakı görüşü dövlətlərarası münasibətlərin möhkəmlənməsinə xidmət edəcək:

"Azərbaycan-Rusiya arasındakı əməkdaşlıq çoxşaxəlidir və bütün sahələrini əhatə edir. Vladimir Putinin bu səfəri tarixi xarakter daşıyır və ölkələrimiz arasında dostluq, müttəfiqlik münasibətlərinin inkişafına töhfə verəcək. Prezidentlərin mətbuata verdiyi birgə Bəyanat, qəbul edilən sənədlər münasibətlərin dostluq və müttəfiqlik xarakterini bir daha təsdiqlədi. Bu gün Azərbaycan-Rusiya əlaqələri dövlətlərin müstəqilliyi, ərazi bütövlüyü, və bir-birinin daxili işlərinə müdaxilə etməmək prinsipləri əsasında inkişaf etməkdədir. Bakıda keçirilən görüş zamanı dövlət başçıları bir daha iki ölkə arasında iqtisadi-ticari münasibətlərlə bağlı bütün məsələləri detallı şəkildə analiz və təhlil etdilər. Hər iki ölkə iqtisadi əlaəqələri daha da inkişaf etdirməyi hədəfləyib".

Deputat vurğulayıb ki, bu gün Azərbaycan cənab prezidentin yürütdüyü uğurlu daxili və xarici siyasət nəticəsində Azərbaycan qonşu ölkələrlə qarşılıqlı faydalı əməkdaşlığın inkişaf etdirilməsinə nail olub:

"Rusiya Prezidenti Vladimir Putinin ölkəmizə səfəri bunu bir daha sübut etdi. İki dövlət başçısının qarşılıqlı səfərləri ölkələr arasındakı münasibətlərin inkişafına töhfələr verir. Xüsusilə də dövlət başçılarının görüşləri əməkdaşlığın dərinləşdirilməsi baxımından müstəsna əhəmiyyət kəsb edir. Düşünürəm ki, bundan sonra da Azərbaycanla Rusiya arasında ikitərəfli münasibətlər bütün sahələr üzrə uğurla inkişaf edəcək".

Telegramda izləyin