"Azərbaycanda təhsil haqları yüksək deyil" - Ekspert

Bir çox insanlar təhsil haqqının yüksək olmasından şikayətlənirlər, hətta universitetə qəbul olan gənclərin bir hissəsi ödənişi edə bilmədiyi üçün təhsilini yarıda qoyur. Bəzi valideyinlər isə borc-xərclə də olsa, övladının təhsil haqqını ödəməyə çalışırlar. Bu səbəblə gənclər təhsil haqqı daha aşağı olan xarici universitetlərə üz tuturlar.

Məsələylə bağlı Sonxeber.az-a açıqlama verən təhsil eksperti İlqar Orucov ölkəmizdə təhsil haqlarının normal olduğunu bildirib.

Onun sözlərinə görə, ölkəmizdə təhsil haqlarını heç də yüksək hesab etmək olmaz. Ekspert bunu universitetlərin sayının çox olmaması, eləcə də təhsil ocaqlarında dövlət sifarişli yerlərin ümumi plan yerlərinin yarısını təşkil etməsi ilə əlaqələndirib:

"Bununla yanaşı, müqayisə etsək, görərik ki, təhsil haqları aşağı olan ölkələrdə təhsilin keyfiyyəti o qədər də ürəkaçan deyil. Keyfiyyətli təhsil təqdim edən ABŞ, Böyük Britaniya kimi ölkələrdə isə təhsil ödənişləri yetəri qədər yüksəkdir".

İ.Orucov bildirib ki, ölkəmizdə təhsil ödənişinin bu qədər yüksək olması tələbatdan da irəli gəlir.

"Lakin mən hər zaman qeyd etmişəm ki, təhsil haqlarının artırılmasının tərəfdarı deyiləm", - deyə o, sonda vurğulayıb.

Telegramda izləyin