Sosial mediada italyan həkimin fotolarından istifadə edib qadınları aldatdılar

Bir qrup nigeriyalı şəxs İtaliyada oftalmoloq işləyən Cüzeppe Sebastionun instaqram hesabından oğurlanan fotolardan istifadə edərək saxta profillər yaradaraq türk qadınlarını aldadıb.

Sonxeber.az türk mediasına istinadən xəbər verir ki, İtaliyan oftalmoloq Cüzeppe Sebastionun sosial media hesabında təqribən 20 min izləyicisi var. Fırıldaqçılar sosial şəbəkədə həkimin fotolarını oğurlayaraq yeni hesab yaradıb.

Saxta hesablarda onlar "Dr. Philips Thomson" və ya "Owen Carter" kimi adlardan istifadə ediblər. Bu hesablar vasitəsilə türk qadınlarına mesaj göndərən fırıldaqçılar əvvəlcə onlarla emosional bağ qurublar.

Fırıldaqçılar özlərini Suriyada işləyən, dul və bir qız atası kimi təqdim edib, yaxın zamanda külli miqdarda pul mükafatı alacaqları yalanını uydurublar. Onlar bu pulu Türkiyəyə göndərmək və yaxşı bir qadınla evlənmək istədiklərini deyərək qadınları aldadıblar. Dəstənin planı qadınları soymaq olub. Onlar qadınlara pulu karqo vasitəsi ilə göndərəcəklərini bildiriblər. Qadınlar karqonun gəlməsi üçün pul ödəyiblər. Bu zaman onlar aldadıqlarını anlayıblar.

Oğuzhan Uysalın verdiyi xəbərə görə, Cüzeppe Sebastio hadisəni təsdiqləyib və sosial mediada insanlara kömək etməyə çalışdığını bildirib: "Bəzi Nigeriyalı fırıldaqçılar saxta profillərdə fotolarımdan istifadə edərək türk qadınları ilə əlaqə saxlayırlar. Qadınları aldadaraq pul istəyirlər. Qadınlar şəkillərimə inanıb pul göndərməsinlər. Çox təəssüf edirəm. Bir çox aldadılan qadın mənimlə əlaqə saxlayıb".

Hadisə ilə bağlı araşdırma başladılıb.

Telegramda izləyin