Azərbaycanda toyuq əti niyə BAHALAŞIB? - AÇIQLAMA

Son günlər ölkədə toyuq əti kəskin bahalaşıb. Belə ki, əvvəllər 5-6 manata satılan toyuqlar, indi marketlərdə 8-10 manata satılır. Bəs görəsən toyuq ətinin bahalaşmasına səbəb nədir ?

Mövzu ilə bağlı Sonxeber.az -a açıqlama verən iqtisadçı Xalid Kərimli bildirib ki, buna səbəb xaricdən idxal edilən yemlərin bahalaşmasıdır:

"Azərbaycan quşçuluq məhsulları ilə bazarın 75 faizini özü təmin edir. Buna baxmayaraq quşçuluq məhsullarının qiymətinin formalaşmasına xaricdən idxal edilən quş yeminin bahalaşması da təsir edir. Yem xərclərinin artması və buna görə xaricdən asılılıq quşçuluq müəissiələrinin dəyər zəncirinin ölkədə formalaşmasını əngəlləyir. Quşçuluq məhsullarını bazara çıxaran müəissiələr həm də ciddi idxalla mübarizə aparır. Xüsusən, Rusiyadan, Ukraynadan, Türkiyədən, MDB ölkələrindən gələn quşçuluq məhsulları qiymətlərin formalaşmasına təsir göstərir. Ukraynada baş verən müharibə ucuz quş ətinin Azərbaycan bazarına girişini məhdudlaşdırıb. Bu da quşçuluq məhsullarının əvvəlki illərə nisbətən bahalaşmasına gətirib çıxarıb".

O həmçinin iri və xırdabuynuzlu heyvanların ətinin bahalaşmasının da toyuq ətinin qiymətinə təsir etdiyini bildirib:

"Bundan başqa qoyun və mal ətinin də davamlı şəkildə bahalaşması quşçuluq məhsullarının qiymətinə təsir göstərir. Çünki quşçuluq məhsulları adətən əvəzedici məhsul hesab olunur. Yəni vətəndaşlar ət seçimi edəndə zülala olan tələbatlarını ödəmək üçün qırmızı ət yerinə bəzən toyuq əti seçirlər. Bu baxımdan qırmızı ətin bahalaşması quş ətinin bahalaşması üçün də şərait yaradır. Quşçuluq müəissiələri öz qiymət siyasətini formalaşdıranda mal ətinin də, qoyun ətinin də qiymətini nəzrə alırlar. Ət bazarında bahalaşma quşçuluq məhsullarının da bahalaşmasına təsir göstərən amildir. Yaxın günlərdə biz ət məhsullarının epizodik olaraq ucuzlaşmasını müşahidə edə bilərik. Amma ümumi şəkildə ət məhsullarının bundan sonra daha da bahalaşacağı gözlənilir".

Çiçək Sadatova

Telegramda izləyin