Sağlamlıq mərkəzinə basqın

Fatihdə sağlamlıq mərkəzinin xəstə qəbulu şöbəsində işləyən 59 yaşlı Metin Kölemen 3 yeniyetmə tərəfindən hücuma məruz qalıb.

Sonxeber.az türk mediasına istinadən xəbər verir ki, hadisə dünən saat 16.46 radələrində Fatih Aksaraydakı sağlamlıq mərkəzində baş verib. İddiaya görə, yaşı 18-dən az olan və narkotik maddələrdən istifadə edən 3 yeniyetmə sağlamlıq mərkəzində xəstə qəbulu şöbəsində işləyən Metin Kölemendən (59) pul istəyib. Kölemen pul vermək istəyəndə onun mobil telefonunu əlindən alıblar. Bu vaxt uşaqlardan biri kişini vuraraq dodağını partladıb. Daha sonra onlar hadisə yerindən qaçıblar.

Hadisədən sonra polisə şikayət edən Kölemen yeniyetmələrin əvvəllər də bura gəlib onu hədələyərək pul istədiklərini bildirib:

"Onlar əvvəllər də bura gəliblər. Məni təhdid edib, pul istəyiblər. Daşla hücum ediblər. Amma yaşları az olduğu üçün şikayət etməmişəm"

Hadisə ilə bağlı istintaq başladılıb.

Telegramda izləyin