Tıxacların davam etməsinin səbəbi nədir ? - AÇIQLAMA

Əvvəllər günün pik saatlarında tıxaclarda qalırdıqsa, hazırda günün istənilən vaxtında tıxac problemi ilə üzləşirik. "Formula1"in bitməsinə baxmayaraq tıxacların davam etməsi sürücülərin narazılıqlarına səbəb olur. Bəs görəsən tıxacların hələ də davam etməsinin səbəbi nədir ?

Mövzu ilə bağlı Sonxeber.az- a açıqlama verən nəqliyyat eksperti Elməddin Muradlı bildirib ki, tıxacların davam etməsinə səbəb ölkəmizdə gedən COP29-a hazırlıq işləri ilə bağlıdır:

"Tıxacın davam etməsi avadanlıqların hələ də sökülməməsi ilə bağlıdır. Digər tərəfdən COP29 -la bağlı müəyyən hazırlıq işləri görülür. Bu da öz növbəsində müəyyən çətinliklər yaradır. Yollarda hələ də təmir işləri gedir. Rənglənmə,binaların fasadlarının təmiri işləri davam edir. Bunun üçün kranlar, qaldırıcı qurğular, müxtəlif texniki vasitələr istifadə olunur. Bunların hamısı yolda hərəkətə təsir göstərir. Ümid edirəm ki, bu işlər bitdikdən sonra müəyyən irəliləyiş əldə olunacaq. Hazırki vəziyyətdə bunu tez bir zamanda bitirmək mümkün deyil. Çünki bu işlər görülməlidir. Belə mötəbər bir tədbirə hazırlaşırıq. Şəhərimiz rahat və təhlükəsiz, gözəl və xoş görünməlidir. Biraz təmkinli olmaq lazımdır. İctimai nəqliyyat inkişaf etdirilməlidir. İlin sonuna qədər ölkəmizə 160 yeni elektrikli avtobus gətiriləcək. Sahibkarlar tərəfindən də 100-dən artıq avtobus gətirilməsi nəzərdə tutulur. Avtobusların sayı artdıqca ümid edirəm ki, yollarda sıxlıq azalacaq. Ən azından gündəlik işə, evə gedənlər ictimai nəqliyyatdan istifadə etsələr, müəyyən müsbət nəticə əldə oluna bilər"

Çiçək Sadatova

Telegramda izləyin