Diddinin anası səssizliyini pozdu - "Oğlum canavar deyil"

İnsan alverində ittiham olunan "Pi Diddi" ləqəbli məşhur reper Şon Con Kombsun 84 yaşlı anası Cenis Smolls Kombs oğlu ilə bağlı qalmaqal haqqında ilk dəfə danışıb.

Axşam.az xəbər verir ki, reperin anasının müraciətində bunlar öz əksini tapıb:

"Oğlum Şon Kombsa qarşı irəli sürülən ittihamlardan məyus olan və dərindən kədərlənən bir ana kimi bildirirəm. Ürəyim parçalanır ki, oğlumu həqiqətə görə yox, yalandan yaranan rəvayətə görə mühakimə edirlər. Oğlumun təqsirsizliyini sübuta yetirmək fürsəti əldə etmədən ona qarşı ictimai tənqid kimi görünən hadisəyə baxmaq sözlə ifadə edilə bilməyəcək qədər ağırdır.

O, hamımız kimi keçmişdə səhvlər edib. Oğlum hər mövzuda haqlı deyil. Məsələn, hotelin təhlükəsizlik görüntülərində yer alan onun keçmiş sevgilisinə qarşı zorakılığı inkar etmək olmaz. Bəzən həqiqət və yalan o qədər bir-birinə qarışır ki, hekayənin bir hissəsini etiraf etmək qorxulu olur.

Ona atılan bu saxta ittihamlar ədalətə nail olmaq üçün deyil, pul qazanmaq istəyindən irəli gəlir. Onlar oğlumu yalandan ittiham etməklə tez qazanc əldə edə biləcəklərini düşünürlər".

O, oğluna qarşı yayılar ittihamları ədalətsizlik adlandırıb:

"Bu sınağın ən pis tərəfi oğlumun etdiyi işlərə görə deyil, insanların onun haqqında inanmaq istədiklərinə görə ləyaqətindən məhrum edilməsini seyr etməkdir. Oğlumun həyatının gözümüzün qabağında məhv olmasını insanların zarafatları və gülüşü fonunda izləmək heç vaxt unuda bilməyəcəyim bir şeydir. Bu ədalətsizlik bizim ailəmiz üçün dözülməzdir.

Oğlum təsvir olunduğu kimi canavar deyil. Mən yalnız o, öz həqiqətini söyləyəcəyi və haqlı çıxacağı anı görmək üçün yaşayım".

Qeyd edək ki, Diddi insan alveri iddiaları ilə bağlı davam edən cinayət istintaqı çərçivəsində sentyabrın ortalarında Nyu-Yorkda həbs edilib.

Telegramda izləyin