"Əhmədin həbsi mövcud problemlərin həllinə kömək etməyəcək" – AÇIQLAMA

Bakıda ailəsinin beş üzvünü qətlə yetirməkdə təqsirli bilinən Əhməd Əhmədov barəsində Bakı Ağır Cinayətlər Məhkəməsində keçirilən sonuncu iclasda qərar elan olunub. Səbinə Məmmədzadənin sədrlik etdiyi məhkəmə tərkibi 25 yaşlı Əhmədin cinayəti anlaqsız vəziyyətdə törətməsi ilə bağlı ekspert rəyini əsaslı hesab edib. Prokuror da Əhmədin anlaqsız olduğuna görə cəzadan azad edilməsini, ixtisaslaşmış xəstəxanada məcburi müalicəsini tələb edib. Əhməd son sözündə heç nə deməyib. Deyəcək sözünün olmadığını bildirib.Onun barəsində Maştağa qəsəbəsində yerləşən ixtisaslaşmış psixatriya xəstəxanasında məcburi müalicə tətbiq ediləcək.

Bəs görəsən Əhmədin həbs cəzasından azad edilməsi cəmiyyətdə potensial "Əhməd"lərin artmasına səbəb olacaqmı?

Mövzu ilə bağlı Sonxeber.az – a açıqlama verən sosioloq Elçin Bayramlı bildirib ki, ilk olaraq bu kimi hadisələrin baş verməsinin qarşısının alınması üçün müəyyən addımlar atılmalıdır:

"Cinayət motivinə, hadisənin detallarına baxanda aydın olur ki, çox ağır dərəcəli psixi xəstədən söhbət gedir. Normal insanın etdiyi cinayətlə psixi xəstənin etdiyi cinayətdə fərqlər var. O, təbii ki, hər hansı formada cəza almalıdır. Amma insan hüquqları baxımından onun psixi müalicə imkanı təmin oluna bilər, amma qapalı həbsxana rejimli bir dispanserdə. Yəni cəmiyyətə çıxış imkanları olmayan dispanserdə psixi müalicə ala bilər. Belə hadisələr çox olur. Bunun fundamental səbəblərinə toxunmaq lazmdır.

Son dövrlərdə psixi xəstələrin, şizofreniklərin sayının artması cəmiyyətdə çox ciddi problemlərlə nəticələnir. Bu problemlərin səbəbi yüksək stress həddi, sosial-iqtisadi çətinliklər, mənəvi-əxlaqi məsələlər və.s. ola bilər. Bundan başqa işsizlik, criminal qruplaşmalar kimi amillərin də insan psixologiyasına təsiri olur. Müxtəlif filmlər, videomateriallar var ki, onlara baxdıqca insanın psixologiyası pozulur. Hətta bəzi psixotrop dərmanların qəbulu belə insan psixologiyasına öz zərərini göstərə bilər. Bütün bunlardan başqa insanın anadangəlmə psixoloji problemləri də ola bilər. Belə problemlərdən əziyyət çəkən insanların sayı getdikcə artır. Bunun səbəbi ölkədə insanlar daimi müayinədən keçməməsidir. Ağır psixi xəstələr əvvəlcədən müəyyən olmalıdırlar. Nəzarətə alınıb müalicə edilməlidirlər. Qəddar cinayətlər törətmə potensialı olan şəxslər cəmiyyətdə azad və sərbəst şəkildə hərəkət etməməlidirlər. Bunun üçün də əhali psixi müayinəyə cəlb olunmalıdır".

Əhmədin həbsi mövcud problemlərin həllinə kömək etməyəcək:

"Əhməd psixoloji problemlərinə baxmayaraq həbs olsa, ömürlük azadlıqdan məhrum edilsə belə bu hallar aradan qalxmayacaq. Bununla digər problemlər həllini tapmayacaq. Biz problemi yaradan səbəblərə fokuslanmalıyıq. Problemlərin vaxtında aradan qaldırılmaması hadisələri bu həddə çatdırır. Güman eləmirəm ki, bu hadisə başqa cinayətlərə də nümunə olsun. Çünki sağlam psixologiyası olan insanlar bu qədər dəhşətli cinayətl törətmirlər. Əgər kimsə bu cinayəti törədərkən psixi problemi olub və ona yüngül cəza verilibsə, bu o demək deyil ki, başqaları da cinayət törətməyə həvəsli olacaq. Amma təbii ki, bunu psixoloji problemli insanlara aid etmək olmaz. Çünki onlar üçün heç bir fəqri yoxdur ki, özlərindən əvvəl kimsə ağır yoxsa yüngül cəza alıb. Çünki tam anlaqsız vəziyyətdə olan adam artıq heç bir nümunə və qanuna məhəl qoymadan bu hərəkəti edəcək. Bu fərdi və individual psixoloji məqamdır.

Mən cəzaların ağırlaşdırılmasının tərəfdarıyam. Həmişə bütün məsələlərdə cəzalar adekvat olmalıdır. Başqalarına dərs olmalıdır. Qeyd etdiyim kimi burda normal insanlardan söhbət gedir. Psixi problemli insanlar üçün belə məqamların heç bir fərqi yoxdur. Belə insanların sayının azalması üçün ölkədə sosial iqtisadi mühit sağlam olmalıdır. İnsanlar psixoloji müayinəyə cəlb edilməlidirlər".

Çiçək Sadatova

Telegramda izləyin