"Azərbaycanın BRİCS sammitində iştirakı ölkənin regional və qlobal məsələlərdə söz sahibi olma imkanlarını artırır" - DEPUTAT

"Cənab Prezident İlham Əliyevin Rusiya prezidenti Vladimir Putinin dəvəti ilə XVI BRİCS Sammitinin "Outreach" "BRİCS+" formatında iştirak etməsi Azərbaycanın xarici siyasətindəki mühüm məqamları və Rusiya ilə münasibətlərin strateji müstəvisini aydınlaşdırmaq imkanı yaradır".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, BRİCS Braziliya, Çin, Rusiya, Hindistan və Cənubi Afrika Respublikası arasında qurulan və dünya iqtisadiyyatında Qərbə alternativ bir güc mərkəzi yaratmağı hədəfləyən bir təşkilatdır:

"Azərbaycanın BRİCS sammitində iştirakı, ölkənin regional və qlobal məsələlərdə söz sahibi olma imkanlarını artırır. Bununla yanaşı ölkə rəhbərimiz cənab İlham Əliyev BRİCS platformasından faydalanaraq regional inkişafın təşviqi üçün yeni perspektivlər yaradır.

Azərbaycan balanslaşdırılmış müstəqil xarici siyasət həyata keçirməklə Gürcüstan və Ermənistandan fərqli olaraq Rusiya ilə müttəfiqlik münasibətlərini qorumağa çalışır. Ölkələrimiz arasındakı əlaqələr son illərdə Cənubi Qafqaz bölgəsində dinamik geosiyasi dəyişikliklər fonunda daha müasir səviyyəyə daxil olub. Rəsmi Bakı və Moskva bir sıra beynəlxalq təşkilatlarda, o cümlədən MDB çərçivəsində birgə fəaliyyət göstərməklə strateji tərəfdaşlıq əlaqələrini artan templə inkişaf etdirirlər".

Deputat vurğulayıb ki, Rusiya Azərbaycanın əsas ticarət tərəfdaşlarından biridir:

"Kənd təsərrüfatı, regional təhlükəsizlik və enerji sektoru ikitərəfli əlaqələrin mühüm aspektlərini təşkil edir. Hər il Azərbaycanda istehsal olunan kənd təsərrüfatı təyinatlı məhsulların böyük bir hissəsi məhz Rusiyaya ixrac olunur. Azərbaycan Cənubi Qafqazın lider dövləti kimi Rusiya ilə münasibətlərin daha da genişləndirilməsində və inkişafında maraqlıdır".

Telegramda izləyin