"Vətən müharibəsindəki qələbəmizlə təkcə ərazi bütövlüyümüzü yox, milli qürurumuzu bərpa etdik" - DEPUTAT

"Azərbaycan Respublikasının Prezidenti, Ali Baş Komandan İlham Əliyev 2020-ci il 27 sentyabr, düşmən təxribatının qarşısını almaq üçün orduya bütün cəbhə boyu əks-hücum əmri verməklə, təkcə Azərbaycan tarixində deyil, Türk dünyasının tarixində yeni səhifə açmış oldu. Rəşadətli Azərbaycan əsgər və zabitləri addım-addım irəliləyərək, Ermənistanın uzun illər ərzində qurduğu mühəndis-istehkam sistemlərini yarıb keçmişlər, torpaqlarımız qəhrəman əsgər və zabitlərimizin, şəhidlərimizin qanı və canı bahasına azad edilmişdir".

Bunu Sonxeber.az-a danışan deputat Şahin Seyidzadə bildirib.

Deputat qeyd edib ki, Azərbaycanın hərbi sahədə qazandığı qələbələr, xüsusilə noyabrın 8-də Şuşanın düşmən əsarətindən qurtarılması müharibənin taleyində həlledici rol oynamış, bununla da, Ermənistan öz məğlubiyyətini etiraf etmişdir:

"2020-ci il noyabrın 10-da imzalanan Azərbaycan Respublikası Prezidentinin, Ermənistan Respublikası baş nazirinin və Rusiya Federasiyası Prezidentinin bəyanatı ilə müharibə Azərbaycanın qələbəsi ilə nəticələnmişdir. Ermənistan kapitulyasiya olunaraq Kəlbəcər, Ağdam və Laçın rayonlarını Azərbaycana qaytarmağa məcbur olmuşdur.

Alınmaz qala sayılan Şuşanı iki il bundan əvvəl erməni işğalından azad edən Azərbaycan Silahlı Qüvvələri şanlı tarix yazdı. Bu şanlı tarix bizimlə əbədi olacaq. Azərbaycan xalqı, gələcək nəsillər bu şanlı Qələbə ilə haqlı olaraq fəxr edəcəklər.

Silahlı qüvvələrin Ali Baş Komandanı müharibə dövründə müsahibələrin birində demişdir ki, "Şuşasız bizim qələbəmiz yarımçıq olacaq". Bu cümlə bütün dünyaya bir mesaj idi və Azərbaycan xalqı yaxşı anladı ki, müharibənin son məqsədi Şuşanı işğaldan azad etməkdir. Təkcə ona görə yox ki, Şuşanın strateji yerləşməsi faktiki olaraq onun azad olunmasından sonra müharibənin taleyini həll edirdi. Ona görə ki, Şuşa Qarabağın tacıdır, Şuşa Azərbaycan xalqının ürəyidir, canıdır, hər bir azərbaycanlı üçün müqəddəs yerdir. Şuşaya gedən yol 27 sentyabr tarixində başlamışdır. Müharibənin ilk günündən son gününə qədər Azərbaycan Silahlı Qüvvələri yalnız irəli gedirdi, 44 gün ərzində bir gün də geri addım atmamışdı. Şuşaya qədər bir çox şəhər və kəndlərimiz işğaldan azad edilmişdir. Hər gün Azərbaycan xalqı Müzəffər Ali Baş Komandandan işğal altında olan torpaqlarımızın azad olunması xəbərini böyük sevgi hissi ilə eşidirdi. Şuşanın azad edilməsi Ermənistan ordusunun belini qırdı".

Deputat vurğulayıb ki, qələbəyə gedən yol keşməkeşli və çətin idi:

"Birinci Qarabağ müharibəsindəki məğlubiyyət xalqımızı mənəvi cəhətdən sarsıtmışdır. O məğlubiyyətin də səbəbləri bəllidir. O vaxt antimilli ünsürlər hakimiyyəti zəbt etmişdilər, hakimiyyət uğrunda mübarizə aparmışdılar, Şuşa kimi alınmaz qalanı faktiki olaraq Ermənistana, ermənilərə təslim etmişdilər. Nəhayət, Azərbaycan xalqı bir yumruq kimi Müzəffər Ali Baş Komandanın ətrafında sıx birləşərək tarixi missiyasını yerinə yetirdi. Müharibəyə gedən yol bir çox istiqamətlərdən keçmişdir. İlk növbədə ordumuzu lazımi silahlar və texnika ilə təchiz edilmişdi. Bunun üçün də güclü iqtisadiyyat olmalı idi. Güclü iqtisadiyyat ordu quruculuğunda əsas amillərdən biridir. Olkəmiz müstəqilliyi əldə edəndə maliyyə, iqtisadi vəziyyəti çox ağır idi. Ona görə güclü iqtisadiyyatın yaradılması müharibədə qələbənin qazanılması işində önəmli amil kimi nəzərə alınırdı. Azərbaycan iqtisadiyyatı gücləndi və dayanıqlı iqtisadiyyatdır. Belə ağır müharibədən çıxmış ölkə kimi azad edilmiş torpaqlarda genişmiqyaslı quruculuq işləri aparılır.
Azərbaycan Respublikası Prezidentinin 02.12.2020-ci il tarixli Sərəncamları ilə sentyabrın 27-si Azərbaycan Respublikasında Anım Günü, noyabrın 8-i Zəfər Günü kimi təsis edilmişdir. Zəfər günü xalqımıza çox yaraşır. Vətən müharibəsindəki Qələbəmizlə təkcə ərazi bütövlüyümüzü yox, milli qürurumuzu bərpa etdik".

Telegramda izləyin