"COP29 Azərbaycanın iqlim diplomatiyasındakı nailiyyətləri ilə yadda qaldı" - DEPUTAT

"Bir il əvvəl beynəlxalq ictimaiyyətin yekdil dəstəyi ilə COP29-a ev sahibliyi Azərbaycana verildi. Azərbaycan COP29-un yüksək səviyyədə keçirilməsi üçün bütün lazımi hazırlıqları həyata keçirdi və tədbirin ən yüksək səviyyədə keçirilməsinə nail oldu".

Bunu Sonxeber.az-a deputat Vasif Qafarov bildirib.

Deputat qeyd edib ki, genişmiqyaslı və planlaşdırılmış böhtan və qarayaxma kampaniyasına baxmayaraq, Azərbaycan iqlim danışıqlarında tarixi nəticələr əldə etməyə müvəffəq oldu:

"COP29-da 80-dən çox dövlət və hökumət başçısı, 76 min nəfərdən çox qonaq iştirak etdi. Bu cür geniş iştirakçılıq tədbirin yalnız formal bir tədbir olmadığını, həmçinin qlobal iqlim siyasətinə ciddi təsir göstərəcəyini sübut edir.
Azərbaycanın ev sahibliyi etdiyi COP29 bir sıra mühüm iqlim diplomatiyası və coğrafi əməkdaşlıq uğurları ilə yadda qaldı. COP29-da Azərbaycanın liderliyi və səyləri, iştirakçı ölkələrin dəstəyi ilə İtki və Zərər Fondunun tam işlək vəziyyətə gətirilməsi təmin olundu. Bu fond, iqlim dəyişikliklərinin fəsadlarına görə inkişaf etməkdə olan ölkələrə maliyyə və texniki dəstək verəcək. Bu, iqlim dəyişikliyi ilə bağlı təhlükə ilə üzləşən kiçik ada dövlətləri və ən az inkişaf etmiş ölkələr üçün böyük əhəmiyyət kəsb edir".

Deputat vurğulayıb ki, Bakıda keçirilən COP29-da əldə olunan Yeni Kollektiv Kəmiyyət Məqsədi 2035-ci ilə qədər 300 milyard ABŞ dolları məbləğində maliyyə resursunun inkişaf etməkdə olan ölkələrə ayrılmasını nəzərdə tutur:

"Bu razılaşma iqlim dəyişikliyinin fəsadları ilə mübarizə aparmaq üçün kritik əhəmiyyət kəsb edir.
COP29 iqlim dəyişiklikləri ilə mübarizədə çoxtərəfli əməkdaşlığın vacibliyini bir daha təsdiqlədi. Azərbaycan inkişaf etmiş və inkişaf etməkdə olan ölkələr arasında körpülər qurulması və qlobal əməkdaşlığın gücləndirilməsi sahəsində liderlik nümayiş etdirdi. Bu yanaşma yalnız iqlim hədəflərinə çatmağa deyil, həm də qlobal təhlükəsizlik, iqtisadiyyat və sosial ədalət sahələrində daha geniş işbirliklərinin təməlini qoydu. COP29 Azərbaycanın iqlim diplomatiyasındakı nailiyyətləri ilə yadda qaldı. COP29 iqlim diplomatiyasında mühüm dönüş nöqtəsidir. Bu uğurlar, gələcəkdə iqlim siyasətinin daha ədalətli, bərabərhüquqlu və səmərəli şəkildə həyata keçirilməsini təmin etmək üçün əsas olacaq".

Telegramda izləyin