26 Fevral Xocalı soyqırımının 33-cü ildönümünə həsr olunmuş silsilə tədbirlər keçirib

Xocalı soyqırımının 33-cü ildönümü münasibətilə təşkil olunan tədbirlər, faciə qurbanlarının əziz xatirəsini anmaq məqsədilə "Ana Harayı" abidəsində keçirilən yürüşlə başlayıb. Yürüşdə gənclər, gənclər təşkilatlarının rəhbər və nümayəndələri, eləcə də Tələbə Gənclər Təşkilatlarının üzvləri iştirak edib. İştirakçılar Azərbaycanın suverenliyi və müstəqilliyi uğrunda canlarını fəda edən şəhidlərin xatirəsini dərin hörmət və ehtiramla yad edərək, "Ana Harayı" abidəsi önünə gül dəstələri düzüblər.

Tədbirlər silsiləsi çərçivəsində Azərbaycan Respublikasının Gənclər Fondunun dəstəyi, NAYORA və "Böyük Qayıdış" Gənclər Təşkilatının birgə təşkilatçılığı ilə Milli Azərbaycan Tarixi Muzeyində Xocalı faciəsinin 33-cü ildönümünə həsr olunan "Xocalı: Unudulmayan tarix" adlı anım tədbiri keçirilib. Dövlət Himninin səsləndirilməsi, Xocalı qurbanlarının və şəhidlərimizin xatirəsinin bir dəqiqəlik sükutla yad edilməsi ilə başlayan tədbirdə Milli Məclis sədrinin müavini Musa Qasımlı, Milli Məclisin deputatı Naqif Həmzəyev, Gənclər Fondunun şöbə müdiri Pərviz Mirələmli, Milli Azərbaycan Tarixi Muzeyinin Vətən müharibəsi Fondunun müdiri Şəfa Mövsümov, "Böyük Qayıdış" Gənclər Təşkilatının sədri Nail Şükürov, Gənclər Təşkilatlarının Milli Şurasının baş katibi Nərminə Hüseynzadə və Vətən müharibəsi qazisi Müseyib Qəhrəmanov çıxış edərək 1992-ci ilin qanlı gecəsində erməni qəsbkarları tərəfindən törədilən amansız faciədən, bu soyqırımının bəşər tarixində insanlığa və bəşəriyyətə qarşı yönəldilmiş ən ağır cinayətlərdən biri, misli görülməmiş qırğın olduğu haqqında geniş məlumat verib, xalqımızın sarsılmayan mübarizə ruhundan, Zəfərə inamından söz açıblar. Həmçinin, Xocalı soyqırımının beynəlxalq aləmdə tanıdılması istiqamətində Heydər Əliyev Fondunun vitse-prezidenti Leyla Əliyevanın təşəbbüsü ilə reallaşdırılan "Xocalıya Ədalət" kampaniyası çərçivəsində görülən işlər və bu kampaniyanın soyqırım həqiqətlərinin dünya ictimaiyyətinin diqqətinə çatdırılmasındakı mühüm rolundan danışılıb. Qeyd olunub ki, kampaniya çərçivəsində Xocalı həqiqətlərinin dünyaya çatdırılması, tarixi ədalətin bərpası və insanlığa qarşı törədilən bu cinayətin tanıdılması məqsədilə müxtəlif ölkələrdə sərgilər, konfranslar, yürüşlər və digər tədbirlər həyata keçirilir.

Azərbaycan Respublikasının Gənclər Fondunun dəstəyi və NAYORA-nın təşkilatçılığı ilə Xocalı soyqırımının 33-cü ildönümünə həsr olunmuş "Xocalı Həqiqətləri Rəqəmsal Sənətdə" adlı foto müsabiqə də başa çatıb. Müsabiqə çərçivəsində iştirakçılar süni intellekt və rəqəmsal alətlərin köməyi ilə faciənin xatirəsini yaşadan, yaddaşlara həkk olunan vizual əsərlər yaradıblar. Müsabiqənin məqsədi, Xocalı soyqırımının dərin emosional təsirini sənət vasitəsilə çatdırmaq, tarixi həqiqətləri yeni nəsillərə innovativ üsullarla ötürmək və vizual ifadənin gücünü nümayiş etdirmək olub. Seçilmiş əsərlər sərgilənib və ən yaxşı üç əsərin müəllifi Nahid Xəlilov, Nəzrin Bayramova, Əminə Süleymanzadə mükafatlandırılıb.

Tədbirlər sırasında "Azadlıq Salnaməsi" adlı intellektual yarış olub. Yarışın məqsədi 26 Fevral tarixini dərindən öyrənmək, milli yaddaşı qorumaq və gənclər arasında tarixi maarifləndirməni gücləndirmək olub. İştirakçılar Xocalı hadisələri, Azərbaycanın müstəqillik uğrunda mübarizəsi və ümumilikdə tarixi faktlar haqqında biliklərini sınayaraq yeni məlumatlar əldə ediblər. Yarışın qaliblərinə sertifikat və mükafatlar təqdim edilib. Qeyd edək ki, intellektual yarış Azərbaycan Respublikası Gənclər Fondunun dəstəyi, NAYORA və "Xəzər İntellektual Gənclər Klubu" İctimai Birliyinin birgə təşkilatçılığı ilə baş tutub.

Telegramda izləyin