Ağzında siqaretlə açdığı tankerin qapağı bomba kimi partladı: İşçi ağır yaralandı - VİDEO

Qaziantep, Nizip rayonu – Nizip Sənaye Zonasında yerləşən ayçiçək yağı fabrikinə məxsus tankerin qapağını açmağa çalışan işçi faciəvi qəza ilə üzləşib.

Sonxeber.az türk mediasına istinadən xəbər verir ki, ağzında siqaret olan işçi qapağı açdığı anda baş verən partlayış nəticəsində ağır yaralanıb. Hadisə təhlükəsizlik kamerası tərəfindən qeydə alınıb.

Hadisə dünən səhər saatlarında "Asnobel" adlı ayçiçək yağı istehsalı müəssisəsində baş verib. İddiaya görə, 27 yaşlı Bekir A. təmizləmə işləri aparmaq üçün özünə məxsus tankerin qapaqlarını açmağa başlayıb. Son qapağı ağzında siqaretlə açan işçi ani partlayışla qarşılaşıb.

Tankerin qapağı sanki bomba kimi partlayaraq işçini havaya sovurub. Partlayışın gücü nəticəsində Bekir A. yerə sərt şəkildə düşərək ağır xəsarətlər alıb.

Yanıq və düşmə nəticəsində ciddi zədələnən işçi ilkin olaraq Nizip Dövlət Xəstəxanasına aparılıb. Vəziyyətinin ağırlaşması səbəbindən daha sonra Qaziantep Şəhər Xəstəxanasına təxliyə olunub.

Hazırda işçinin vəziyyətinin kritik olduğu bildirilir. Hadisə ilə bağlı hüquq-mühafizə orqanları araşdırma aparır.

Telegramda izləyin